Kuala-Lumpur shahrida 22-noyabr kuni Malayziya turizm, san’at va madaniyat vaziri o‘rinbosari Muhammad Baxtiyor bin Van Chik O‘zbekiston elchisi Ravshan Usmonovga O‘zbekiston “Osiyoning eng boy tarixiy merosga ega mamlakati” deb tan olingani to‘g‘risidagi diplomni topshirdi.
TIV matbuot xizmatining xabar berishicha, taqdirlash marosimida Osiyoning 20 mamlakatidan 1000 ga yaqin kishi ishtirok etgan. G‘oliblar Malayziyaning Research House of Asia Media kompaniyasi tomonidan Osiyo mintaqasi mamlakatlarida o‘tkazilgan ijtimoiy va marketing tadqiqotlari natijalari asosida aniqlangan.
Research House of Asia Media Malayziyaning yirik nashriyot uylaridan biri bo‘lib, The Top 10 of Asia, The Top 10 of Malaysia, The Top 10 of Indonesia, The Top 10 of Singapore, The Top 10 of Thailand hamda The Top 10 of Lifestyle kabi ingliz tilidagi jurnallarni chop etadi.
Top 10 Asia jurnalining elektron versiyasi 1 milliondan ortiq obunachiga ega. Ushbu mashhur nashr sahifalarida O‘zbekistonning madaniy, tarixiy va me’moriy merosi, shuningdek, sayyohlik salohiyati to‘g‘risidagi maqolalar bir necha bor nashr etilgan.
Taqdimot marosimida O‘zbekistonda UNESCO Butunjahon merosiga kiritilgan 5 ta obyekt mavjudligi, shuningdek, mamlakat O‘zbekiston milliy o‘ziga xosligini, islom madaniyati va me’morchiligining ko‘plab yodgorliklarini saqlab qolishga erishgani ta’kidlangan.
Izoh (0)