“Daryo” saytida haftaning eng muhim va muhokamali xabarlari sharhini boshlaymiz.
Bayrog‘imiz qabul qilingan kun – 18-noyabrdan O‘zbekistonda saylovoldi tashviqoti boshlandi. Bu saylov kampaniyasi davrida amalga oshiriladigan va saylovchilarni nomzodni yoki siyosiy partiyani yoqlab ovoz berishga undashga qaratilgan faoliyat bo‘lib, ovoz berishga bir kun qolganda nihoyasiga yetadi. Asosan omma oldida yig‘ilish, ochiq bahs-munozaralar orqali tashviq qilinadi, mol-mulk yoki pul berish yo‘li bilan tashviqot yuritish mumkin emas.
O‘zbekiston televideniyesida demokratik debatlar boshlandi. Ta’kidlash kerakki, bu yilgi saylovlar avvalgilaridan qizg‘inroq bormoqda. Xususan, jurnalist va blogerlarning partiya faollariga bergan keskin savollari ommada katta qiziqish uyg‘otib, qisqa videolar shaklida internetda qo‘lma-qo‘l tarqalayotganini kuzatish mumkin.
* * *
Futbol bo‘yicha 19-noyabr kuni JCh—2022 saralashining ikkinchi bosqichi 6-turi doirasida biznikilar Falastinga qarshi o‘yin o‘tkazdi. O‘yinda Eldor Shomurodov faollik namoyish qilib, arablar darvozasiga ikkita gol urdi. 2:0 bilan yakunlangan uchrashuvdan so‘ng to‘purarimiz suhbatda Saudiya bilan yutqiziq haqida gapirib, “u yerdagi vaziyatlar yaxshimas edi, ammo yakkakurashlarda imkoniyatni boy bergan edik”, dedi. Shunday qilib, falastinliklardan o‘ch olgan O‘zbekiston TJ guruhda birinchi o‘ringa ko‘tarilib oldi.
* * *
O‘zbekiston aholisining katta qismi yoshlar, yoshlarning katta qismi abituriyentlar ekani sabab test imtihonlaridagi o‘zgarishlarga deyarli hech kim befarq emas. Xo‘sh, kelasi yili avgust imtihonlari qanday bo‘ladi? 2020—2021-o‘quv yilida abituriyentlar beshta fandan imtihon topshiradi. Barcha uchun majburiy bo‘lgan uchta fan — ona tili, matematika va O‘zbekiston tarixi qo‘shimcha tariqasida kiritiladi. Qolgani tanlangan sohaga oid fanlardir. Majburiy uchta fandan osonroq savollar bo‘ladi.
Biroq chorak asr muqaddam milliy ta’lim tizimimizga innovatsiya sifatida joriy etilgan test tizimini tanqid qiluvchilarning ovozi tobora balandroq yangramoqda. Hamma davrda ham yoshlar o‘zgarishlar tarafdori bo‘lib kelgan. Xususan, deputat Rasul Kusherboyev “Test tizimidan butunlay voz kechib, abituriyentlar o‘qishga faqat suhbat, savol-javob asosida qabul qilinishi kerak deb hisoblayman va bu o‘zini oqlaydi”, dedi. Yoshlar ittifoqi raisi Alisher Sa’dullayev esa hozirgi test tizimi zamon talabiga javob bermasligini aytib xalqaro tajribani o‘rganish, abituriyentning ijodiy qobiliyatini baholash ham kerakligini urg‘uladi.
* * *
Kirib keldi oltin kuz, gaz-svetdan umid uz. Kuz quruq keldi, biroq oxirgi haftalar sovushi bilan gazsiz va elektrsiz fuqarolar turarjoyini qo‘lbola usullarda isitish chorasini ko‘rishga kirishdi. Yong‘in xavfsizligini hisobga olmay o‘rnatilgan qo‘lbola isitish moslamalari esa xavf-xatar o‘chog‘iga aylanib, har yilgidek fuqarolar o‘limiga sabab bo‘la boshladi.
19-noyabr kuni Jizzaxning Zomin tumanida IIB binosini qurayotgan yetti nafar yollanma ishchi is gazidan zaharlanib, voqea joyida vafot etdi.
Avvalroq Jizzax viloyati Do‘stlik tumanida is gazidan bir oiladan ikki kishi zaharlangani va ulardan biri vafot etgan edi. 17-noyabr kuni esa Namanganda ona va uning ikki farzandi is gazidan zaharlanib halok bo‘ldi. Noyabr oyining boshlarida Samarqanddagi yangi qurilayotgan uyda besh nafar usta is gazidan zaharlangan edi.
* * *
Endi egizak osmono‘parlarni ko‘rish uchun AQSh yoki Malayziyaga borishingizga hojat qolmaydi. Chunki yaqin yillar ichida Namanganda egizak osmono‘par binolar quriladi. Namangan Square’da taxminan 325 000 kvadrat metr ish joyi, turar joyi va chakana savdo maydonchalarini 10 gektardan ortiq park maydonida noyob landshaft dizayn bilan qurish rejalashtirilgan. Namangan Square’ning asosiy bezagi noyob dizayn va konstruksiyali ikki osmono‘par bino bo‘ladi.
* * *
22-noyabr sanasi O‘zbekistonda birinchi qorni in’om etdi. Toshkent, Buxoro, Surxondaryo kabi viloyatlarda mayda shakar qor yog‘di. Shuningdek, qor Farg‘ona vodiysiga eltuvchi Qamchiq dovonini qopladi. Qor havosi butun respublikaga ta’sir qilib ayoz kirib keldi. Gidrometeorologlar endi iliq havo qaytmasligidan darak bermoqda. Dekabr o‘rtacha nam va harorat bo‘yicha mo‘tadil bo‘ladi. Oy davomida harorat kechasi 2—7 daraja iliqdan 0—5 daraja sovuqqacha, kunduzi 10—15 daraja iliqdan 0—5 daraja iliqqacha o‘zgarib turadi.
* * *
Xabaringiz bor – o‘tgan hafta Toshkent hokimi Jahongir Ortiqxo‘jayevning jurnalistlarga tahdidli audiosi tarqalib ketishi internetda katta aks-sado bergandi. Prezident Shavkat Mirziyoyev 22-noyabr kuni videoselektorda davlat idoralari rahbarlarining ommaviy axborot vositalari xodimlari bilan munosabatlari masalasiga ham to‘xtalgani muomala madaniyatini unutgan rahbarga tegishli deb talqin etildi.
...Matbuotni faoliyatimizni aks ettiruvchi ko‘zgu deb bilishimiz kerak. Afsuski, ko‘p yillar davomida biz ana shu ko‘zguga qarashni o‘zimizga ep ko‘rmadik. Oqibatda haqiqiy qiyofamizni ko‘rolmay qoldik. Xalqimizga ochiq-oydin ma’lum bo‘lib turgan aybu nuqsonlarimizni tan olmasdan, “men hammadan zo‘rman” deb o‘zimizga bino qo‘yib, kekkayib yuraverdik. “Yuzing qiyshiq bo‘lsa, oynadan o‘pkalama” degan dono maqolni butkul unutib qo‘ydik... Barcha bo‘g‘indagi rahbarlarning jamoatchilik bilan, ayniqsa ommaviy axborot vositalari bilan muomala madaniyati har qachongidan ham muhim masalaga aylandi.* * *O‘zbekiston prezidenti Shavkat Mirziyoyev.
Toshkentda ilk bor aralash jang san’atlari bo‘yicha GFC-20 (Gorilla Fighting Championship) turniri o‘tkazildi. Turnirga faxriy mehmon sifatida Habib Nurmagomedov, Roy Jons kabi jang san’ati yulduzlari taklif etildi. Humo Arena’da o‘tgan 13 ta jangning yettitasida o‘zbekistonlik sportchilar ham oktagonga chiqishdi. Nursulton Ro‘ziboyev, Jahongir Jumayev, Ahliddin Mirzadavlatov, Muzaffar Rajabov, Avliyoxon Hamidov g‘alabaga erishishgan bo‘lsa, Jamshid Rahmonaliyev va Amin Ergashev mag‘lubiyatga uchrashdi. Asosiy jang rossiyalik Umar Nurmagomedov hamda argentinalik Brayan Gonsales o‘rtasida bo‘lib, Nurmagomedov g‘alaba quchdi.
“Daryo” yangiliklarini kuzatib boring. O‘zbekiston va dunyo xabarlaridan eng birinchi voqif bo‘ling.
Izoh (0)