«Дарё» сайтида ҳафтанинг энг муҳим ва муҳокамали хабарлари шарҳини бошлаймиз.
Байроғимиз қабул қилинган кун – 18 ноябрдан Ўзбекистонда сайловолди ташвиқоти бошланди. Бу сайлов кампанияси даврида амалга ошириладиган ва сайловчиларни номзодни ёки сиёсий партияни ёқлаб овоз беришга ундашга қаратилган фаолият бўлиб, овоз беришга бир кун қолганда ниҳоясига етади. Асосан омма олдида йиғилиш, очиқ баҳс-мунозаралар орқали ташвиқ қилинади, мол-мулк ёки пул бериш йўли билан ташвиқот юритиш мумкин эмас.
Ўзбекистон телевидениесида демократик дебатлар бошланди. Таъкидлаш керакки, бу йилги сайловлар аввалгиларидан қизғинроқ бормоқда. Хусусан, журналист ва блогерларнинг партия фаолларига берган кескин саволлари оммада катта қизиқиш уйғотиб, қисқа видеолар шаклида интернетда қўлма-қўл тарқалаётганини кузатиш мумкин.
* * *
Футбол бўйича 19 ноябрь куни ЖЧ—2022 саралашининг иккинчи босқичи 6-тури доирасида бизникилар Фаластинга қарши ўйин ўтказди. Ўйинда Элдор Шомуродов фаоллик намойиш қилиб, араблар дарвозасига иккита гол урди. 2:0 билан якунланган учрашувдан сўнг тўпураримиз суҳбатда Саудия билан ютқизиқ ҳақида гапириб, «у ердаги вазиятлар яхшимас эди, аммо яккакурашларда имкониятни бой берган эдик», деди. Шундай қилиб, фаластинликлардан ўч олган Ўзбекистон ТЖ гуруҳда биринчи ўринга кўтарилиб олди.
* * *
Ўзбекистон аҳолисининг катта қисми ёшлар, ёшларнинг катта қисми абитуриентлар экани сабаб тест имтиҳонларидаги ўзгаришларга деярли ҳеч ким бефарқ эмас. Хўш, келаси йили август имтиҳонлари қандай бўлади? 2020—2021-ўқув йилида абитуриентлар бешта фандан имтиҳон топширади. Барча учун мажбурий бўлган учта фан — она тили, математика ва Ўзбекистон тарихи қўшимча тариқасида киритилади. Қолгани танланган соҳага оид фанлардир. Мажбурий учта фандан осонроқ саволлар бўлади.
Бироқ чорак аср муқаддам миллий таълим тизимимизга инновация сифатида жорий этилган тест тизимини танқид қилувчиларнинг овози тобора баландроқ янграмоқда. Ҳамма даврда ҳам ёшлар ўзгаришлар тарафдори бўлиб келган. Хусусан, депутат Расул Кушербоев «Тест тизимидан бутунлай воз кечиб, абитуриентлар ўқишга фақат суҳбат, савол-жавоб асосида қабул қилиниши керак деб ҳисоблайман ва бу ўзини оқлайди», деди. Ёшлар иттифоқи раиси Алишер Саъдуллаев эса ҳозирги тест тизими замон талабига жавоб бермаслигини айтиб халқаро тажрибани ўрганиш, абитуриентнинг ижодий қобилиятини баҳолаш ҳам кераклигини урғулади.
* * *
Кириб келди олтин куз, газ-светдан умид уз. Куз қуруқ келди, бироқ охирги ҳафталар совуши билан газсиз ва электрсиз фуқаролар тураржойини қўлбола усулларда иситиш чорасини кўришга киришди. Ёнғин хавфсизлигини ҳисобга олмай ўрнатилган қўлбола иситиш мосламалари эса хавф-хатар ўчоғига айланиб, ҳар йилгидек фуқаролар ўлимига сабаб бўла бошлади.
19 ноябрь куни Жиззахнинг Зомин туманида ИИБ биносини қураётган етти нафар ёлланма ишчи ис газидан заҳарланиб, воқеа жойида вафот этди.
Аввалроқ Жиззах вилояти Дўстлик туманида ис газидан бир оиладан икки киши заҳарлангани ва улардан бири вафот этган эди. 17 ноябрь куни эса Наманганда она ва унинг икки фарзанди ис газидан заҳарланиб ҳалок бўлди. Ноябрь ойининг бошларида Самарқанддаги янги қурилаётган уйда беш нафар уста ис газидан заҳарланган эди.
* * *
Энди эгизак осмонўпарларни кўриш учун АҚШ ёки Малайзияга боришингизга ҳожат қолмайди. Чунки яқин йиллар ичида Наманганда эгизак осмонўпар бинолар қурилади. Namangan Square’да тахминан 325 000 квадрат метр иш жойи, турар жойи ва чакана савдо майдончаларини 10 гектардан ортиқ парк майдонида ноёб ландшафт дизайн билан қуриш режалаштирилган. Namangan Square’нинг асосий безаги ноёб дизайн ва конструксияли икки осмонўпар бино бўлади.
* * *
22 ноябрь санаси Ўзбекистонда биринчи қорни инъом этди. Тошкент, Бухоро, Сурхондарё каби вилоятларда майда шакар қор ёғди. Шунингдек, қор Фарғона водийсига элтувчи Қамчиқ довонини қоплади. Қор ҳавоси бутун республикага таъсир қилиб аёз кириб келди. Гидрометеорологлар энди илиқ ҳаво қайтмаслигидан дарак бермоқда. Декабрь ўртача нам ва ҳарорат бўйича мўътадил бўлади. Ой давомида ҳарорат кечаси 2—7 даража илиқдан 0—5 даража совуққача, кундузи 10—15 даража илиқдан 0—5 даража илиққача ўзгариб туради.
* * *
Хабарингиз бор – ўтган ҳафта Тошкент ҳокими Жаҳонгир Ортиқхўжаевнинг журналистларга таҳдидли аудиоси тарқалиб кетиши интернетда катта акс-садо берганди. Президент Шавкат Мирзиёев 22 ноябрь куни видеоселекторда давлат идоралари раҳбарларининг оммавий ахборот воситалари ходимлари билан муносабатлари масаласига ҳам тўхталгани муомала маданиятини унутган раҳбарга тегишли деб талқин этилди.
...Матбуотни фаолиятимизни акс эттирувчи кўзгу деб билишимиз керак. Афсуски, кўп йиллар давомида биз ана шу кўзгуга қарашни ўзимизга эп кўрмадик. Оқибатда ҳақиқий қиёфамизни кўролмай қолдик. Халқимизга очиқ-ойдин маълум бўлиб турган айбу нуқсонларимизни тан олмасдан, «мен ҳаммадан зўрман» деб ўзимизга бино қўйиб, кеккайиб юравердик. «Юзинг қийшиқ бўлса, ойнадан ўпкалама» деган доно мақолни буткул унутиб қўйдик... Барча бўғиндаги раҳбарларнинг жамоатчилик билан, айниқса оммавий ахборот воситалари билан муомала маданияти ҳар қачонгидан ҳам муҳим масалага айланди.* * *Ўзбекистон президенти Шавкат Мирзиёев.
Тошкентда илк бор аралаш жанг санъатлари бўйича ГФC-20 (Gorilla Fighting Championship) турнири ўтказилди. Турнирга фахрий меҳмон сифатида Ҳабиб Нурмагомедов, Рой Жонс каби жанг санъати юлдузлари таклиф этилди. Humo Arena’да ўтган 13 та жангнинг еттитасида ўзбекистонлик спортчилар ҳам октагонга чиқишди. Нурсултон Рўзибоев, Жаҳонгир Жумаев, Аҳлиддин Мирзадавлатов, Музаффар Ражабов, Авлиёхон Ҳамидов ғалабага эришишган бўлса, Жамшид Раҳмоналиев ва Амин Эргашев мағлубиятга учрашди. Асосий жанг россиялик Умар Нурмагомедов ҳамда аргентиналик Брайан Гонсалес ўртасида бўлиб, Нурмагомедов ғалаба қучди.
«Дарё» янгиликларини кузатиб боринг. Ўзбекистон ва дунё хабарларидан энг биринчи воқиф бўлинг.
Изоҳ (0)