14—19-noyabr kunlari Osiyo mintaqasida JCh—2022 va Osiyo Kubogi—2023 musobaqalari saralash bosqichining ikkita tur o‘yinlari bo‘lib o‘tdi. “Daryo” guruhlardagi holat bilan tanishtiradi.
“A” guruhi
5-tur doirasida guruh yetakchilari Suriya va Xitoy terma jamoalari o‘zaro bahs yuritdi. Unda suriyaliklar 2:1 hisobidagi g‘alabani qo‘lga kiritdi. Mazkur o‘yindan keyin xitoyliklar ustozi Marchello Lippi iste’fo berishini ma’lum qildi. Chin yurti vakillarining bu yo‘qotishidan Filippin unumli foydalandi va Maldivni mag‘lub etgan holda Xitoy bilan ochkolar borasida tenglashib oldi. Keyingi turda esa Xitoy dam oldi va Suriya o‘zida Filippinni minimal hisobda mag‘lub etgan holda guruh yetakchiligini mustahkamlab oldi.Guruhda Suriya 15 ochko bilan yakka peshqadam bo‘lib turibdi. Uning ortidan Xitoy va Filippin (7 ochkodan) bormoqda. Bitta zaxira o‘yiniga ega Xitoy yetakchidan 8 ochkoga ortda qolmoqda.
“B” guruhi
Ushbu guruhda ham kurash juda qizg‘in tus olmoqda. Avstraliya 5-turdagi markaziy bahsda Iordaniyani 1:0 hisobida mag‘lub etishga erishdi. Kuvayt esa Xitoy Taypeyiga javobsiz to‘qqizta gol urdi. Keyingi turda Xitoy Taypeyi Iordaniya maydonida mehmon bo‘ldi, unda mezbonlar 5:0 hisobida zafar quchdi. Kuvaytliklar 6-turda Nepalni mag‘lub etgan holda guruhdagi vaziyatni o‘zi uchun o‘nglab oldi. Avstraliya esa bu turda dam oldi.Guruh jadvalida qolganlardan bir o‘yin kam o‘tkazdan Avstraliya yuz foizlik natija bilan peshqadam bo‘lib turibdi. “Kengurular” Kuvayt va Iordaniyani ikki ochkoga ortda qoldirmoqda.
“C” guruhi
Osiyo jamoalari ichida FIFA reytingida yetakchilik qilayotgan Eron bu safar ham yo‘qotishga uchradi. 5-turning markaziy o‘yinlaridan biri Iroq va Eron terma jamoalari o‘rtasida kechdi. Unda iroqliklar hakam tomonidan qo‘shib berilgan vaqtda (90+2) gol urgan holda g‘alabani ilib ketdi. Bahrayn o‘sha turda Gonkong bilan durang o‘ynab qo‘ydi (0:0). Keyingi turda Bahrayn safarda Iroqdan ochko tortib oldi (0:0).Shu tariqa, Eron bitta o‘yin kam o‘tkazib, yetakchi Iroqdan (11 ochko) besh ochkoga, Bahrayndan esa uch ochko ortda qolmoqda.
“D” guruhi
14-noyabr kuni barcha guruhlarda bo‘lgani kabi O‘zbekiston terma jamoasi qatnashayotgan guruhda ham yetakchilar to‘qnash keldi. Vadim Abramov boshchiligidagi O‘zbekiston terma jamoasi Saudiya Arabistonini mehmon qildi. Mazkur bahsda ikki bor oldinga chiqib olgan “oq bo‘rilar” so‘nggi daqiqalarda o‘tkazib yuborilgan gollar tufayli g‘alabani qo‘ldan chiqardi. Guruhning ikkinchi o‘yinida Yaman o‘zida Falastindan ustun keldi.6-turni O‘zbekiston terma jamoasi Falastinga qarshi o‘tkazdi. Toshkentdagi “Paxtakor” stadionida bo‘lib o‘tgan o‘yinda Eldor Shomurodovning dubli evaziga o‘zbekistonliklar dastlabki turdagi mag‘lubiyat revanshini oldi. Narigi o‘yinda Singapur termasi Yamanni taslim etdi. Saudiya Arabistoni esa bu turda dam oldi.
6-turdan so‘ng O‘zbekiston terma jamoasi 9 ochko bilan yetakchilik qilmoqda. Ikkinchi pog‘onada bitta zaxira o‘yiniga ega Saudiya Arabistoni (8) bormoqda. Kuchli uchlikni 7 ochko bilan Singapur yakunlab bergan. Shuningdek, Yaman (5) va Falastin (4) terma jamoalari ham imkoniyatni saqlab turibdi.
“E” guruhi
Qolgan guruhlardan farqli ravishda mazkur to‘rtlikdagi kurash noodatiy va pavvis ruhda kechmoqda. 2022-yilgi Jahon Chempionati mezboni hisoblangan Qatar termasi va Ummon guruhda peshqadamlik qilmoqda. Ummon o‘tgan ikki turda g‘alabaga erishgan holda vaziyatni yaxshilab oldi. 5-turda dam olgan Qatar keyingi o‘yinda Afg‘onistonni minimal hisobda mag‘lub etdi.Guruhda Qatar 13 ochko bilan yetakchilik qilmoqda, undan bir ochko kam jamg‘argan Ummon ikkinchi o‘rinni egallagan. Keyingi o‘rindagi Afg‘oniston (4) yetakchilardan ancha ortda qolmoqda. Osiyo Kubogi—2019 musobaqasida o‘zini yaxshi tomondan ko‘rsatgan Hindiston terma jamoasi hali birorta ham g‘alabaga erisha olmadi va 3 ochko bilan 4-pog‘onaga joylashgan.
“F” guruhi
Bu guruhda kutilganidek Yaponiya terma jamoasi o‘z gegemoniyasini o‘rnatdi. 5-turda “ko‘k samuraylar” Qirg‘izistonga tashrif buyurdi va ortga g‘alaba bilan qaytdi. Tojikiston esa kutilmaganda Myanmaga yutqazib qo‘ydi. Keyingi turda myanmaliklar Mog‘ulistonni ham yenggan holda ketma-ket ikkinchi g‘alabasini tantana qildi. Qirg‘iziston va Tojikiston o‘rtasidagi Markaziy Osiyo derbisida kuchlar teng keldi.Shu tariqa yo‘qotishlarsiz ketayotgan Yaponiya 12 ochko bilan yakka peshqadam bo‘lib turibdi. Qolganlardan bitta o‘yin kam o‘tkazgan yaponlar eng yaqin ta’qibchilari bo‘lmish Qirg‘iziston va Tojikistonni besh ochkoga ortda qoldirmoqda.
“G” guruhi
5-turda Vyetnam o‘z maydonida BAA bilan to‘qnash keldi. Unda mezbonlar minimal hisobdagi g‘alabani qayd etgan holda amirliklar jamoasini qiyin ahvolga solib qo‘ydi. Malayziya esa Tailand va Indoneziya ustidan g‘alabaga erishib, ochkolarini 9 taga yetkazib oldi. Vyetnam keyingi o‘yinda Tailand bilan bahs yuritdi va bu uchrashuvda nursiz durang qayd etildi.6-turdan so‘ng mag‘lubiyatsiz seriya qayd etayogan Vyetnam 11 ochko bilan guruh yetakchiligini o‘z qo‘liga olgan. Malayziya esa (9) ikkinchi o‘rinni band etdi. Tailand 8 ochko bilan uchinchi pog‘onanini egallab turibdi. Guruhda birinchi savatchadan saralangan BAA esa (6) kutilmaganda to‘rtinchi pog‘onaga tushib ketdi, biroq amirliklarda bitta zaxira o‘yini mavjud.
“H” guruhi
Bu guruh o‘yinlari ham kutilmagan natija va intrigaga boy o‘tmoqda. Guruhning yaqqol favoriti Janubiy Koreya safarda Livan darvozasiga yo‘l topa olmadi va “Osiyo yo‘lbarslari” ketma-ket ikkinchi o‘yinda durang qayd etdi. Turkmaniston esa 5-turda Shimoliy Koreyani o‘zida qabul qilib, ishonchli g‘alabani (3:1) qo‘lga kiridi. Keyingi turda turkmanlar Shri-Lankaga imkon qoldirmadi. Livan esa KXDR bilan ham nursiz durang qayd etdi.Shu tariqa ketma-ket ikki g‘alabadan keyin Markaziy Osiyo vakili 9 ochko bilan guruh peshqadamiga aylandi. Bitta kam o‘yin o‘tkazgan Janubiy Koreya, Livan va KXDR jamoalari 8 ochkodan jamg‘arib, keyingi o‘rinlarni egallab turibdi.
Shu bilan saralash bahslari 2020-yilning mart oyi oxiriga qadar tanaffusga chiqdi. 2020-yilning mart va iyun oylarida bo‘lib o‘tadigan to‘rtta turdan so‘ng JCh—2022 uchinchi saralash bosqichiga yo‘l olgan 12 ta jamoa nomi ma’lum bo‘ladi. JCh—2022 ikkinchi saralash bosqichida o‘z guruhida birinchi o‘rinni egallagan sakkiz terma jamoa to‘g‘ridan to‘g‘ri uchinchi saralash bosqichi ishtirokchisiga aylanadi. Ikkinchi o‘rinlar orasida eng yaxshi natijaga ega to‘rtta terma jamoa JCh—2022 hal qiluvchi saralash bosqichiga yo‘llanmani qo‘lga kiritadi. Shuningdek mazkur jamoalar 2023-yilgi Osiyo Kubogiga ham yo‘l oladi
Osiyo Kubogi—2023 ning qolgan ishtirokchilar esa quyidagicha aniqlanadi:
Qolgan 12 ta terma jamoa Osiyo Kubogi uchinchi saralash bosqichiga yo‘l olish uchun pley-off bosqichida ishtirok etadi (o‘yinlar uy-safar tizimida o‘tkaziladi). Ushbu 12 ta terma jamoadan sakkiztasi uchinchi saralash bosqichiga chiqadi.
Uchinchi bosqichda 24 ta terma jamoa Osiyo Kubogiga yo‘l olish uchun oltita guruhga bo‘lingan holda 12 ta yo‘llanma uchun kurash olib boradi. O‘yinlar uy-safar tizimida o‘tkaziladi va guruhlarda dastlabki ikkita o‘rinni egallagan jamoalar Osiyo Kubogiga yo‘l oladi. Va yuqoridagi 12 ta ilk yo‘llanma sohiblariga qo‘shilib, musobaqa ishtirokchilar sonini 24 taga yetkazadi.
Nodirxon Hamidxonov tayyorladi
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @daryo_sport’ga obuna bo‘ling!
Izoh (0)