Shavkat Mirziyoyev Toshkentni aylandi. O‘zbekiston Prezidenti dastlab Mirzo Ulug‘bek tumanidagi IT-parkda bo‘ldi va uning yangi bosqichi qurilishiga tamal toshini qo‘ydi. So‘ng “O‘zekspomarkaz”da o‘tayotgan Sanoat yarmarkasi va kooperatsiya birjasi bilan tanishdi. Shuningdek, Islom sivilizatsiyasi markazi qurilishini borib ko‘rdi.
Yetti, yetti, yetti: Jizzaxda IIB binosini ta’mirlayotgan yetti usta is gazidan zaharlanib o‘ldi. Samarqandda suyultirilgan gaz tashuvchi mashina portlashi oqibati unga qo‘shilib yana oltita transport vositasi yonib ketdi. Qashqadaryoda bir oilaning yetti a’zosi bodring-pomidor konversasidan zaharlangan edi, ularning ikki nafari vafot etdi.
O‘zbekistonda rahbariyat yuksak lavozim taklif qilsa, rad etish mumkinmi? Rahbariyat rad javobiga qanday munosabat bildiradi? O‘zbekiston Senati raisi Tanzila Norboyeva javob beradi. U, shuningdek, hukumatni xalqdan xafa bo‘lmaslikka chaqirgan, OAVdan yashirinib yurgan amaldorlar — vaqtinchalik holat ekanini aytgan.
“O‘zgidromet” Qamchiq dovonida 21—25-noyabr kunlari kuchli qor yog‘ishi mumkinligi haqida ogohlantirdi (qish boshlandi). “Tuman tushib, ko‘rinuvchanlik 50 metrgacha pasayadi, shamol sekundiga 17—22 metr tezlikda esadi. 21—23-noyabrda harorat -5...-3 darajagacha, 24—25-noyabrda -13...-8 darajagacha soviydi. Yo‘lda qor uyumlari, muzlamalar hosil bo‘ladi”, — deyiladi xabarda.
“U yangi hayot boshlash uchun Rossiyaga borib kelgandi”. Qashqadaryo shilqim haydovchining xatti-harakatlari sabab fojiali halok bo‘lgan aktrisa Gavhar Sharipova haqida uning hamkasblari va do‘stlari fikr bildirdi. Ularning aytishicha, aktrisa so‘nggi vaqtlarda tushkun kayfiyatda bo‘lgan, “do‘stlari uning qo‘ng‘iroqlariga javob bermagan”.
Jizzaxda 15 yoshli o‘quvchi qiz ona bo‘ldi. Tug‘uruqxona bu haqda prokuraturaga xabar bergan, prokuratura esa “16 yoshga to‘lmagan shaxs bilan jinsiy aloqa qilish” moddasi bo‘yicha ish ochgan. Avvalroq shunga o‘xshash hodisalar Qashqadaryo, Farg‘ona viloyatlari va Toshkent shahrida ham qayd etilgan edi.
O‘zbekistonda yana nima gap? 2020-yil uchun davlat budjeti to‘g‘risidagi qonun loyihasiga deputatlar tomonidan 20 ga yaqin o‘zgartirish kiritilmoqda. 10 oy ichida 4 milliard dollarlik oltin eksport qilindi. Termizda 10 oy ichida 672 ta daydi hayvon yo‘q qilindi. Oliy Majlisga ko‘rsatilgan deputatlikka nomzodlar ichida marhumlar ham borligi haqida gap-so‘zlar tarqaldi. Qozog‘istonda o‘zbekistonlik donorlarning organlarini Isroilga sotgan shifokor hibsga olindi. Andijondagi uyda gaz portladi, uch kishi kuydi. O‘zbekiston Afg‘onistonga gumanitar yordam jo‘natdi. “Bi-bi-si” o‘zbek milliy taomlari sog‘liq uchun foydali ekanligini e’tirof etdi. Habib Nurmagomedov Toshkentga kelmoqda.
Jahonda-chi? Afg‘oniston prezidenti mamlakatda IShID faoliyatiga butunlay barham berilganini ma’lum qildi. AQSh Senati Gonkongdagi vaziyat bo‘yicha qonun loyihasini ishlab chiqdi, Gonkong hukumati esa Amerikadan uning ichki siyosatiga aralashmaslikni so‘radi. Erondagi norozilik namoyishlarida halok bo‘lganlarning soni 100 nafardan oshdi. Iroqdagi norozilik namoyishlarida neft terminallari va konlariga olib boruvchi yo‘llar ham yopib qo‘yildi. Aleksandr Lukashenko ketma-ket oltinchi marta Belarus prezidentligiga saylovlarda ishtirok etishini ma’lum qildi. Italiyada uy hayvonlarining huquqlari bolalar huquqlari bilan tenglashtirilishi mumkin.
Izoh (0)