O‘zbekiston Sog‘liqni saqlash vazirligi huzuridagi “Tibbiyot qurilish” injiniring davlat unitar korxonasi mansabdor shaxslari 2016—2019-yillarda 2,3 milliard so‘mlik budjet mablag‘larini talon-toroj qilgan. Bu haqda Bosh prokuratura tomonidan xabar berildi.
Ma’lum qilinishicha, Bosh prokuratura huzuridagi Iqtisodiy jinoyatlarga qarshi kurashish departamenti tomonidan Sog‘liqni saqlash vazirligi huzuridagi “Tibbiyot qurilish” injiniring davlat unitar korxonasining 2016—2019-yillardagi faoliyati yuzasidan tekshiruv o‘tkazilgan. Natijada korxona mansabdor shaxslari Sog‘liqni saqlash vazirligi tizimidagi bino va inshootlarni ta’mirlash uchun budjetdan ajratilgan jami 2,3 milliard so‘m mablag‘ni yaqin qarindoshlariga qarashli xo‘jalik yurituvchi subyektlarga amalda ko‘rsatilmagan dezinfeksiya va kompyuter xizmatlari, haqiqatda bajarilmagan qurilish ishlari uchun o‘tkazib berib, talon-toroj qilganligi aniqlangan.
Bundan tashqari, ular jinoiy yo‘l bilan topilgan pul mablag‘larining asl manbaini yashirib, mulkka aylantirish maqsadida, Labo, Nexia 3, Cobalt, Lacetti va Malibu 2 rusumli jami 9 ta avtomashinani xarid qilgan va shu tariqa, jinoiy yo‘l bilan topilgan daromadlarini legallashtirgan.
Tekshiruv davomida davlat manfaatlariga yetkazilgan zararning 1,1 milliard so‘mi qoplanishi ta’minlangan.
Hozirda, mazkur holatlar yuzasidan Sog‘liqni saqlash vazirligi “Tibbiyot qurilish” injiniring davlat unitar korxonasi mansabdor shaxslari va boshqalarga nisbatan Jinoyat kodeksining tegishli moddalari bilan jinoyat ishi qo‘zg‘atilib, tergov harakatlari olib borilmoqda.
Izoh (0)