Un va qolipli non xarid qilish bo‘yicha har oylik kompensatsiya oladigan O‘zbekiston fuqarolari soni 1,3 million nafardan ortiqni tashkil qiladi. Bu haqda O‘zbekiston Moliya vazirligi ma’lum qildi.
Foto: “Aniq.uz”
Moliya vazirligining xabariga ko‘ra, Vazirlar Mahkamasining 2019-yil 14-oktabrdagi “Don, un va non yetkazib berish tizimiga bozor mexanizmlarini to‘liq joriy etish chora-tadbirlari to‘g‘risida”gi qaroriga muvofiq, 2019-yil 1-oktabrdan un va qolipli non xarid qilish bo‘yicha qo‘shimcha xarajatlarni qoplash uchun har oylik pul kompensatsiyasi 22 300 so‘mdan 50 000 so‘mga oshirilgan.
Mavzuga doir: Toshkentda “buxanka” narxi oshdi
O‘zbekistondagi 1,3 milliondan ortiq fuqaroga kompensatsiya to‘lovlarini o‘z vaqtida yetkazilishini ta’minlash maqsadida Moliya vazirligi huzuridagi budjetdan tashqari Pensiya jamg‘armasi tomonidan talab qilingan mablag‘lar 2019-yil 18-oktabr sanasida to‘liq moliyalashtirilib berilgan hamda Pensiya jamg‘armasi tomonidan kompensatsiyalarning oshgan miqdorlarini fuqarolarga joriy oyda yetkazilishi yuzasidan tegishli choralar ko‘rilgan.
Vazirlik tomonidan qayd etilishicha, Pensiya jamg‘armasi tomonidan kompensatsiyalarning oshgan miqdorlari farqi bo‘yicha qo‘shimcha vedomostlar tuzilib, 2019-yilning 16—17-oktabr sanasida tijorat banklari hamda Xalq banki filiallariga yetkazilgan. Shuningdek, mazkur to‘lovlar uchun mablag‘lar 16-oktabrdan 19-oktabrgacha to‘liq moliyalashtirilgan.
