«Дон, ун ва нон етказиб бериш тизимига бозор механизмларини тўлиқ жорий этиш чора-тадбирлари тўғрисида»ги ҳукуматнинг 2019 йил 14 октябрдаги қарорига асосан ун нархини давлат томонидан назорат қилиш тўхтатилди. Шу билан бирга, фуқароларни ушбу амалиётнинг кескин таъсирларидан сақлаш ва ижтимоий ҳимояни кучайтириш мақсадида 2019 йил 1 октябрдан ун ва қолипли нон харид қилиш бўйича қўшимча харажатларни қоплаш учун ҳар ойлик пул компенсацияси 22 300 сўмдан 50 000 сўмга оширилди.
Пенсия жамғармаси матбуот хизматининг «Дарё»га маълум қилишича, республика бўйича жами 1,7 миллион нафар фуқарога тўланаётган пул компенсацияси миқдори оширилди. Шунингдек, пул компенсацияси олувчи тоифалар сони 2 тага кўпайиб, 11 тоифага етказилди, 1 октябрдан бошлаб қўшимча равишда 64,9 минг нафар фуқаро ҳамда 218,1 мингта оилага илк маротаба пул компенсацияси жорий қилинди.
Пенсия жамғармаси орқали пул компенсацияси олувчилар сони 1,4 миллион нафарни ташкил этди. Маҳалла фуқаролар йиғинлари орқали пул компенсацияси олувчилар сони 514,4 минг нафарни ташкил этмоқда.
Натижада бугунги кунга келиб пул компенсация олувчи аҳоли қаторига қўшимча равишда икки тоифа қўшилиши натижасида пул компенсацияси олувчилари сони 18,5 фоизга ошиб, 2 миллион нафарни ташкил этмоқда.
Қарорга мувофиқ, пул компенсациялари пенсия ва нафақа тўловлари билан бир вақтда амалга оширилмоқда.
Молия вазирлиги томонидан шу йилнинг октябрь—декабрь ойларида пул компенсацияларини янги миқдорларда тўлаш учун, қўшимча тарзда 189 миллиард сўм миқдорида маблағ ажратилди. (Шулардан Пенсия жамғармаси томонидан тайинланган пенсия ва нафақа олувчилари учун 125 миллиард сўм ва маҳаллалар томонидан тайинланадиган нафақалар ва моддий ёрдам олувчилар учун 64 миллиард сўм).
Умумий ҳисобда нон компенсациялари тўлови учун 2019 йилда республика бюджети ҳисобидан 604 миллиард сўм ажратилган.
Эслатиб ўтамиз, Ўзбекистонда «буханка» нархи сўнгги 20 кун ичида иккинчи марта қимматлашди. Айрим ҳудудларда унинг нархи 2500 сўмгача кўтарилди. Шавкат Мирзиёев 7 ноябрь куни ўтказилган видеоселекторда шу масалага алоҳида тўхталиб, нон ишлаб чиқариш таннархини камайтириш бўйича кўрсатмалар берди. Шундан сўнг Қорақалпоғистонда нон нархи назоратга олиниб, 1500 сўмдан сотила бошланди.
Изоҳ (0)