Joriy yilning noyabr oyi boshida AQSh Prezidentining Ijroiya apparati qoshidagi Savdo vakolatxonasi (USTR) Preferensiyalar bosh tizimining O‘zbekistonga nisbatan qo‘llanilishiga oid masalani ko‘rib chiqishni to‘xtatish bo‘yicha qaror qabul qildi, deb xabar beradi TIV matbuot xizmati.
Preferensiyalar bosh tizimi — rivojlanayotgan mamlakatlardan importni amalga oshirish borasidagi 1974-yili qabul qilingan “Savdo to‘g‘risida”gi qonunga muvofiq AQShga tovarlarni boj to‘lovisiz olib kirish rejimi. O‘zbekiston 1994-yilning avgustida AQShga tovarlarini bojsiz yetkazib berish huquqini qo‘lga kiritgandi.
Eslatib o‘tamiz, 2018-yilning noyabrida O‘zbekistonning AQShdagi elchixonasi AQSh Savdo vakolatxonasi vakili tomonidan uyushtirilgan eshituvda qatnashga edi. Mazkur ish “Ishchilar huquqlari bo‘yicha xalqaro forum” (ILRF) va “Intellektual mulk bo‘yicha xalqaro alyans” (IIPA) nodavlat tashkilotlarining petitsiyasi bo‘yicha ko‘rib chiqilgandi. Petitsiyalarda ishchilar huquqlari buzilayotgani va intellektual mulk huquqlari himoyasi sust ekanligi ta’kidlangan bo‘lib, O‘zbekisonga nisbatan tovarlarning bojsiz importini cheklash talab qilingandi.
Tomonlarning arizalari ko‘rib chiqilgandan so‘ng, AQSh Savdo vakolatxonasi O‘zbekistonga nisbatan bojsiz savdo qo‘llanilishini saqlab qolish va intellektual mulk bo‘yicha eshituvlarni yopish bo‘yicha qaror qabul qildi.
USTR sharhida ta’kidlanishicha, ko‘rib chiqish tartibini yopish to‘g‘risidagi qaror O‘zbekiston intellektual mulkni himoya qilishning huquqiy rejimini takomillashtirish bo‘yicha muhim qadamlarni qo‘ygan, jumladan, O‘zbekiston 1971-yilda Fonogramma ishlab chiqaruvchilarning manfaatlarini himoya qilish to‘g‘risidagi konvensiyasiga va 1996-yili ijro va fonogrammalarga mualliflik huquqi to‘g‘risida kelishuvlarga qo‘shilgan. Vakolatxona vakillari ushbu konvensiyalarning kelgusida bajarilishiga va mualliflik huquqini himoya qilishning samarali mexanizmlari ishlab chiqilishiga umid bildiradi.
AQSh prezidenti administratsiyasi vakillari O‘zbekistonda intellektual mulk bo‘yicha Markaziy Osiyoda ishchi guruhning yaratilishiga yordam ko‘rsatgani, mualliflik huquqlari himoyasiga yuqori darajada e’tibor qaratayotganini ta’kidlagan.
“Ushbu ijobiy o‘zgarishlar O‘zbekistonda intellektual mulk huquqlarini himoya qilish va amalga oshirish borasida keskin burilish nuqtasi deb hisoblaymiz. Biz ushbu ijobiy qadamlarga tayanib, O‘zbekistondagi investitsion muhitni yaxshilaydigan sa’y-harakatlarni davom ettirishni istaymiz”, — deya ta’kidlaydi AQSh Savdo vakolatxonasi vakili.
Izoh (0)