Moliya vaziri o‘rinbosari: “Yuqori inflyatsiya sabab islohotlarda hech qanday ma’ni bo‘lmaydi”

Uzoq vaqt davomida yuqori inflyatsiyaning saqlanib qolishi islohotlar davomida erishilgan natijalarning yo‘qolishiga olib keladi. Bu haqda moliya vazirining birinchi o‘rinbosari Timur Ishmetov ma’lum qildi, deb xabar beradi “Gazeta.uz”.

Vazir o‘rinbosari inflyatsiya darajasini pasaytirishga erishilmasa, aholining yashash tarzini yaxshilash yo‘lida olib borilgan islohotlardan hech qanday ma’ni bo‘lmasligini bildirgan.

“Afsuski, so‘nggi uch yil davomida yuqori inflyatsiya darajasi kuzatildi. Joriy yilda inflyatsiya darajasi 15,5 foiz bo‘lishi kutilayotgan bo‘lsa, o‘tgan yili ushbu ko‘rsatkich 14,3 foizni tashkil etgandi. Keng ko‘lamli islohotlar amalga oshirilayotgan davlatlarda inflyatsiya yuqori bo‘ladi. O‘zbekistonda turli sohalardagi islohotlar bilan bir qatorda katta miqdorda investitsiyalar ham yo‘naltirilmoqda. Shuningdek, narxlarni erkinlashtirish jarayoni ham boshlandi, chunki xorijiy va hattoki mahalliy investitsiyalarni jalb qilish uchun ishlab chiqarilayotgan mahsulotlarning narxlari erkin belgilanishi kerak. Shu sababli inflyatsiya — bu tabiiy jarayon. Yuqori darajadagi inflyatsiyaning uzoq davom etishi esa erishilgan natijalarning qo‘ldan boy berilishiga olib keladi”, — deydi Timur Ishmetov.

Moliya vazirining birinchi o‘rinbosarini ta’kidlashicha, islohotlar aholi turmushini yaxshilash maqsadida olib borilmoqda, inflyatsiya esa aholining real daromadlarini “yeb qo‘ymoqda”.

Yuqori inflyatsiya darajasida aholining xarid qobiliyati pasayib ketadi, bu esa tovarlarga bo‘lgan talabning kamayishiga olib keladi. Talabning pastligi esa sotuvlarga salbiy ta’sir ko‘rsatib, ishlab chiqarishdagi daromadlaring kamayishiga sabab bo‘ladi. Uning so‘zlariga ko‘ra, tadbirkorlarning iqtisodiy ahvoli yomonlashishi mamlakat yalpi ichki mahsulotiga bevosita ta’sir qiladi.

“Shu sababli Prezident inflyatsiya darajasini keskin kamaytirish vazifasini topshirdi. Bu rostdan ham iqtisodiy blokning asosiy masalasi. 2020-yilda biz inflyatsiyani 12,5—13 foizga, 2021-yilda 11 foizga, 2022-yildan boshlab esa 10—9,5 foizga tushirishimiz kerak. Inflyatsiyani pasaytirish yo‘lidagi asosiy vazifamiz — iqtisodiy siyosatda moliyaviy intizomni ta’minlash. Ya’ni tasdiqlangan budjet doirasida keraksiz xarajatlar bo‘lmasligi kerak.

Ikkinchidan, iste’mol tovarlari ishlab chiqarishga, ishlamayotgan loyihalarning samaradorligini oshirishga, maksimal ishlab chiqarish quvvatini ta’minlashga yo‘naltirilgan loyihalarni to‘liq amalga oshirishga erishish. Bundan tashqari biz shu sohadagi loyihalarga ko‘proq e’tibor qaratishimiz kerak”, — deydi moliya vaziri o‘rinbosari.

Eslatib o‘tamiz, noyabr oyi boshida 2020-yilga mo‘ljallangan “Fuqarolar uchun budjet” loyihasi e’lon qilingan bo‘lib, unda 2022-yilda inflyatsiyani 9,5 foizga tushirish ko‘zda tutilgan edi.