Узоқ вақт давомида юқори инфляциянинг сақланиб қолиши ислоҳотлар давомида эришилган натижаларнинг йўқолишига олиб келади. Бу ҳақда молия вазирининг биринчи ўринбосари Тимур Ишметов маълум қилди, деб хабар беради «Gazeta.uz».
Вазир ўринбосари инфляция даражасини пасайтиришга эришилмаса, аҳолининг яшаш тарзини яхшилаш йўлида олиб борилган ислоҳотлардан ҳеч қандай маъни бўлмаслигини билдирган.
«Афсуски, сўнгги уч йил давомида юқори инфляция даражаси кузатилди. Жорий йилда инфляция даражаси 15,5 фоиз бўлиши кутилаётган бўлса, ўтган йили ушбу кўрсаткич 14,3 фоизни ташкил этганди. Кенг кўламли ислоҳотлар амалга оширилаётган давлатларда инфляция юқори бўлади. Ўзбекистонда турли соҳалардаги ислоҳотлар билан бир қаторда катта миқдорда инвестициялар ҳам йўналтирилмоқда. Шунингдек, нархларни эркинлаштириш жараёни ҳам бошланди, чунки хорижий ва ҳаттоки маҳаллий инвестицияларни жалб қилиш учун ишлаб чиқарилаётган маҳсулотларнинг нархлари эркин белгиланиши керак. Шу сабабли инфляция — бу табиий жараён. Юқори даражадаги инфляциянинг узоқ давом этиши эса эришилган натижаларнинг қўлдан бой берилишига олиб келади», — дейди Тимур Ишметов.
Молия вазирининг биринчи ўринбосарини таъкидлашича, ислоҳотлар аҳоли турмушини яхшилаш мақсадида олиб борилмоқда, инфляция эса аҳолининг реал даромадларини «еб қўймоқда».
Мавзуга доир: Марказий банк нима учун Ўзбекистонда инфляция кўрсаткичи 5 фоиз бўлиши кераклигига изоҳ берди
«Шу сабабли Президент инфляция даражасини кескин камайтириш вазифасини топширди. Бу ростдан ҳам иқтисодий блокнинг асосий масаласи. 2020 йилда биз инфляцияни 12,5—13 фоизга, 2021 йилда 11 фоизга, 2022 йилдан бошлаб эса 10—9,5 фоизга туширишимиз керак. Инфляцияни пасайтириш йўлидаги асосий вазифамиз — иқтисодий сиёсатда молиявий интизомни таъминлаш. Яъни тасдиқланган бюджет доирасида кераксиз харажатлар бўлмаслиги керак.
Иккинчидан, истеъмол товарлари ишлаб чиқаришга, ишламаётган лойиҳаларнинг самарадорлигини оширишга, максимал ишлаб чиқариш қувватини таъминлашга йўналтирилган лойиҳаларни тўлиқ амалга оширишга эришиш. Бундан ташқари биз шу соҳадаги лойиҳаларга кўпроқ эътибор қаратишимиз керак», — дейди молия вазири ўринбосари.
Эслатиб ўтамиз, ноябрь ойи бошида 2020 йилга мўлжалланган «Фуқаролар учун бюджет» лойиҳаси эълон қилинган бўлиб, унда 2022 йилда инфляцияни 9,5 фоизга тушириш кўзда тутилган эди.
Изоҳ (0)