DXX Farg‘ona viloyati boshqarmasi xodimlari tomonidan ko‘p miqdordagi qalbaki xorijiy valyutasini o‘tkazmoqchi bo‘lgan shaxs ushlandi, deb xabar beradi O‘zA.
Andijon viloyatining Qo‘rg‘ontepa tumanida yashovchi Sh.R. ismli shaxs qalbaki AQSh dollari kupyuralarini o‘tkazib kelayotganligi aniqlangan. 22-oktabr kuni o‘tkazilgan tezkor tadbirda uning qilmishlari fosh etildi. Sh.R.ning tanishi B.A. kirakashlik bilan shug‘ullanuvchi O.T. bilan uning boshqaruvidagi Lasetti Gentra rusumli avtomashinasida Farg‘ona tumani Vodil qishlog‘idagi avtoturargoh hududiga kelgan.
Sh.R.ning ko‘rsatmasiga ko‘ra, qalbaki 5300 AQSh dollari evaziga to‘qqiz dona Samsung rusumli telefon apparatlarini qabul qilib, pullarni bergan vaqtida ushlangan. Avtotransport vositasi belgilangan tartibda ko‘zdan kechirilganda avtomashinada fuqaro Sh.R.ga tegishli bo‘lgan 53 dona 100 kupyurali AQSh dollari borligi aniqlangan.
Farg‘ona viloyati IIB EKBning ekspertiza xulosasiga ko‘ra, kupyuralar pul belgilari ishlab chiqaradigan korxonada tayyorlanmagani, mazkur kupyuralar poligrafiya usulida nusxalash-ko‘paytirish texnikasi yordamida tayyorlangani ma’lum bo‘ldi.
Mazkur holat bo‘yicha Sh.R.ga nisbatan jinoyat ishi qo‘zg‘atilib, hozirda tergov-surishtiruv ishlari olib borilmoqda.
Izoh (0)