Ижтимоий тармоқларда Тошкент шаҳар Миробод тумани Меҳржон кўчасида жойлашган 2-сонли ИИБ бўлимида 25 ёшли шахсни кўрикдан ўтказиш мақсадида Миробод туман тез ёрдам бўлимига келиб тушган мурожаат юзасидан тарқалган видеохабар Соғлиқни сақлаш вазирлиги томонидан ўрганилди.
Вазирлик матбуот хизматининг маълум қилишича, турли ижтимоий тармоқларда тарқалган видеолавҳа шу йилнинг 24 октябрь куни эмас, балки 26 июнида рўй берган ҳамда воқеа жойидаги шахслар томонидан тасвирга олинган. Унга кўра, туман ички ишлар бўлими ходимлари хизмат вазифаси вақтида икки нафар аёлни маст ҳолатда жамоат жойида жанжаллашиб турганида қўлга олади. Вазиятни ойдинлаштириш мақсадида улар билан суҳбатлашиш асносида алкагол маҳсулоти истеъмол қилингани аниқланади. Аммо шунга қарамай фуқароларнинг жисмоний ва руҳий ҳолатини тиббий тасдиқлаш мақсадида тонгги соат 7:55 атрофида ички ишлар ходимлари томонидан тез ёрдам чақирилади.
Бу ерда тасвирдаги аёл томонидан чақириққа кеч келдинг дея, ўша ердаги ички ишлар ходимлари гувоҳлигида шифокор Э.С.га нисбатан турли камситиш ва ҳақоратомуз сўзлар айтилади. Шунга қарамай шифокор аёлни кўрикдан ўтказади ва унда мастлик ҳолати мавжудлигини аниқлаган.Вазирлик хабарида айтилишича, баъзи ҳолларда «тез ёрдам»га тушаётган чақириқларнинг 30-40 фоизи асоссиздир. Ҳатто у ёки бу сурункали касаллиги бор беморлар гоҳ қон босимини ўлчатиш, гоҳида қайсидир уколни қилдириш ёки бўлмаса режали даволаш муолажалари учун ҳам «тез ёрдам»ни чақиртиради.
«Устига устак худди шу ҳолат ички ишлар ходимлари томонидан оддий текширувларга ҳам чақириш ҳолатларида тез-тез учраб турмоқда. Бу эса оддий чақириқдан кўра кўпроқ вақт олади, шифокор ҳам, тиббий ёрдам машинаси ҳам банд бўлиб қолишига олиб келади», — дейилади хабарда.
Изоҳ (0)