Umumfoydalanishda bo‘lgan avtomobil yo‘llarini, temir yo‘l kesishmalarini, sun’iy inshootlarni va ichki xo‘jalik yo‘llarini saqlash, transport vositalari va piyodalarning harakatlanish xavfsizligini ta’minlash borasida bir qator chora-tadbirlar amalga oshirilmoqda.
Jumladan, IIV Axborot xizmatidan “Daryo”ga xabar berishlaricha, 2019-yilning yanvar—sentabr oylari davomida avtomobil yo‘llari va shahar ko‘chalarida 16 070 ta yo‘l belgisi o‘rnatilgan, 25 136 ta eskirgan yo‘l belgilari esa yangisiga almashtirilgan.
Ayni vaqtda yo‘llarga, yo‘l inshootlariga, yo‘l harakatini tartibga solib turuvchi texnik vositalarga shikast yetkazish, ularni saqlash qoidalarini buzgan 225 nafar mansabdor shaxsga nisbatan ma’muriy choralar ko‘rilgan.
Qayd etishlaricha, 164 ta holatda Ma’muriy javobgarlik to‘g‘risidagi kodeksning 147-moddasi 1-qismiga asosan, 29 ta holatda 147-moddasi 2-qismiga asosan, 32 ta holatda esa 196-moddaga asosan ma’muriy choralar ko‘rilgan.
Ma’lumot uchun, Ma’muriy javobgarlik to‘g‘risidagi kodeksning 147-moddasi 1-qismi (yo‘llarga, temir yo‘ldan o‘tish joylariga, yo‘l harakatini tartibga solib turuvchi boshqa inshootlar yoki texnik vositalarga shikast yetkazish, shuningdek yo‘l harakatiga qasddan xalal berish, shu jumladan yo‘l qoplamasini ifloslantirish yo‘li bilan xalal berish) bo‘yicha javobgar deb topilgan shaxs eng kam ish haqining 10 baravari (2,23 million so‘m) miqdorida jarima to‘laydi.
Xuddi shu moddaning 2-qismi (yo‘l belgilarini o‘rnatish, yo‘llarni, temir yo‘ldan o‘tish joylari va boshqa yo‘l inshootlarini harakat uchun xavfsiz holda saqlash qoidalarini buzish yoki yo‘lning ayrim qismlaridan foydalanish harakat xavfsizligiga tahdid etadigan paytda ularda harakatni o‘z vaqtida taqiqlash yoki cheklash choralarini ko‘rmaslik) bilan javobgar deb topilgan mansabdor shaxsga esa eng kam ish haqining 15 baravari (3,34 million so‘m) miqdorida jarima solinadi.
Ma’muriy javobgarlik to‘g‘risidagi kodeksning 196-moddasi (huquqbuzarlikni sodir etish sabablarini hamda uni sodir etishga olib keluvchi shart-sharoitlarni bartaraf etish yuzasidan ichki ishlar organlarining yozma taqdimnomalarini bajarish choralarini ko‘rmaslik) bo‘yicha javobgar deb topilgan mansabdor shaxs esa eng kam ish haqining ikki baravari (446 ming so‘m)dan besh baravari (1,11 million so‘m)gacha miqdorda jarima to‘lashi kerak bo‘ladi.
Izoh (0)