Ijtimoiy tarmoqlarda Andijonning Jalaquduq tumanidagi stomatologiya bo‘linmasida davolangan ayolning gepatit B virusini yuqtirgani haqida xabar tarqaldi. Andijon viloyat hokimligi matbuot xizmatining ma’lum qilishicha, zudlik bilan soha mutaxassislaridan iborat ishchi guruh tuzilib, murojaat bo‘yicha o‘rganish ishlari olib borildi.
O‘rganish jarayonida murojaatchi ayol G.Q. Andijon viloyati sog‘liqni saqlash boshqarmasi Jalaquduq tuman tibbiyot birlashmasining xo‘jalik hisobidagi stomatologiya bo‘limida 2012-yilda davolanganini, gepatit B virusini ham o‘sha vaqtda yuqtirib olganini aytgan.
G.Q. nima sababdan kasallikni aniqlangan vaqtida, ya’ni 7 yil avval xabar qilmasdan bugungi kunga kelib xabar qilinayotgani so‘ralganida, tayinli javob bera olmagan. Uning turmush o‘rtog‘i M.Q. ham yuqoridagi holatlarni ta’kidlab, vaziyatga oydinlik kirituvchi savollarga to‘liq javob bera olmagan.
Murojaatda kasallikka sabab qilib ko‘rsatilgan stomatologiya bo‘linmasi faoliyat jarayoni bilan tanishilganda, bo‘linmada jami 22 nafar xodim, shundan, 7 nafari oliy toifali shifokor, 2 nafar hamshira, 2 nafar sanitariya xodimlari va 10 nafar texnik xodimlar faoliyat ko‘rsatishi aniqlangan. Bo‘linmada mehnat qiluvchi barcha tibbiy xodimlar Sog‘liqni saqlash vazirligining 200-sonli buyrug‘iga asosan davriy tibbiy ko‘rikdan o‘tkazilgan. Bino xonalariga ichimlik suv va kanalizatsiya tarmog‘i kiritilgan, barchasi ishchi holatda.
Muassasada 5 ta tish davolash xonalari mavjud bo‘lib, xonalar ta’mirtalab holatida, stomatologik kreslolar va tibbiy anjomlar eskirgan. Xonalarda muolajalar uchun tashkil etilgan qo‘l yuvish moslamalari ham yangilanishga muhtoj. Xonalarning sanitariya holati qoniqarsiz. Kunlik tozalov ishlari talab darajasida olib borilmagan. Tish davolash va qo‘yishda foydalaniladigan tibbiy anjomlar o‘rtasida tabiiy ta’sir oqibatida eskirish va zanglashlar mavjud.
Shuningdek, steril hisoblangan yumshoq materiallar quruq holatda emasligi, aksincha nam holatda ekanligi aniqlangan. Foydalanilgan qonli paxtalar zararsizlantirilmasdan tashlanayotganligi, bemorlardan epidemiologik tahliliy ma’lumotlar umuman yig‘ilmayotganligi ma’lum bo‘lgan.
Yuqorida aniqlangan kamchiliklarni bartaraf etish yuzasidan soha mutaxassislari tomonidan zaruriy tavsiyalar berilgan. Stomatologiya bo‘linmasining keyingi ish faoliyati davomida yuqoridagi kabi holatlarga yo‘l qo‘ymaslik, aniqlangan kamchiliklarni bartaraf etish hamda belgilangan qat’iy me’yor va normalarda ishni qayta tashkil etish uchun bo‘linma faoliyati to‘xtatilgan.
Andijon viloyati sog‘liqni saqlash boshqarmasi Jalaquduq tuman tibbiyot birlashmasining xo‘jalik hisobidagi stomatologiya bo‘limining mudiri B.X. esa lavozimidan chetlashtirilgan.
Izoh (0)