Умумфойдаланишда бўлган автомобиль йўлларини, темир йўл кесишмаларини, сунъий иншоотларни ва ички хўжалик йўлларини сақлаш, транспорт воситалари ва пиёдаларнинг ҳаракатланиш хавфсизлигини таъминлаш борасида бир қатор чора-тадбирлар амалга оширилмоқда.
Жумладан, ИИВ Ахборот хизматидан «Дарё»га хабар беришларича, 2019 йилнинг январь—сентябрь ойлари давомида автомобиль йўллари ва шаҳар кўчаларида 16 070 та йўл белгиси ўрнатилган, 25 136 та эскирган йўл белгилари эса янгисига алмаштирилган.
Айни вақтда йўлларга, йўл иншоотларига, йўл ҳаракатини тартибга солиб турувчи техник воситаларга шикаст етказиш, уларни сақлаш қоидаларини бузган 225 нафар мансабдор шахсга нисбатан маъмурий чоралар кўрилган.
Қайд этишларича, 164 та ҳолатда Маъмурий жавобгарлик тўғрисидаги кодекснинг 147-моддаси 1-қисмига асосан, 29 та ҳолатда 147-моддаси 2-қисмига асосан, 32 та ҳолатда эса 196-моддага асосан маъмурий чоралар кўрилган.
Маълумот учун, Маъмурий жавобгарлик тўғрисидаги кодекснинг 147-моддаси 1-қисми (йўлларга, темир йўлдан ўтиш жойларига, йўл ҳаракатини тартибга солиб турувчи бошқа иншоотлар ёки техник воситаларга шикаст етказиш, шунингдек йўл ҳаракатига қасддан халал бериш, шу жумладан йўл қопламасини ифлослантириш йўли билан халал бериш) бўйича жавобгар деб топилган шахс энг кам иш ҳақининг 10 баравари (2,23 миллион сўм) миқдорида жарима тўлайди.
Худди шу модданинг 2-қисми (йўл белгиларини ўрнатиш, йўлларни, темир йўлдан ўтиш жойлари ва бошқа йўл иншоотларини ҳаракат учун хавфсиз ҳолда сақлаш қоидаларини бузиш ёки йўлнинг айрим қисмларидан фойдаланиш ҳаракат хавфсизлигига таҳдид этадиган пайтда уларда ҳаракатни ўз вақтида тақиқлаш ёки чеклаш чораларини кўрмаслик) билан жавобгар деб топилган мансабдор шахсга эса энг кам иш ҳақининг 15 баравари (3,34 миллион сўм) миқдорида жарима солинади.
Маъмурий жавобгарлик тўғрисидаги кодекснинг 196-моддаси (ҳуқуқбузарликни содир этиш сабабларини ҳамда уни содир этишга олиб келувчи шарт-шароитларни бартараф этиш юзасидан ички ишлар органларининг ёзма тақдимномаларини бажариш чораларини кўрмаслик) бўйича жавобгар деб топилган мансабдор шахс эса энг кам иш ҳақининг икки баравари (446 минг сўм)дан беш баравари (1,11 миллион сўм)гача миқдорда жарима тўлаши керак бўлади.
Изоҳ (0)