2019-yilning to‘qqiz oyida O‘zbekiston yo‘llarida 4,6 mln qoidabuzarlik qayd etildi. Piyodalar 252 ming marta qoida buzgan

IIV Yo‘l harakati xavfsizligi bosh boshqarmasi va uning hududiy idoralari tomonidan 2019-yilning yanvar—sentabr oylari davomida jami 4 607 034 ta (to‘rt million olti yuz yetti ming o‘ttiz to‘rtta) yo‘l harakati qoidabuzarligi aniqlandi.

IIV Axborot xizmatidan “Daryo”ga ma’lum qilishlaricha, ularning 2 055 254 tasi qo‘pol qoidabuzarlik, 25 120 tasi esa mast holda mashina haydash bilan bog‘liq, 252 072 holat esa piyodalar qoidabuzarligi bilan bog‘liq.

Hisobot davrida 19 436 ta transport vositasini boshqarish vaqtida uyali telefondan foydalanish, 779 909 ta xavfsizlik kamaridan taqmagan holda transport vositasini boshqarish, 628 ta monitordan foydalanish yoki o‘zboshimchalik bilan o‘rnatish, 41 179 ta transport vositasini sug‘urta polisiz boshqarish qoidabuzarliklari aniqlangan.

Shuningdek, 18 422 nafar huquqbuzarga nisbatan rasmiylashtirilgan ma’muriy hujjatlar tegishli choralar ko‘rish uchun sud idoralariga yuborilib, ularning 8492 nafari (46,1 foizi) transport vositasini boshqarish huquqidan mahrum etilgan.