O‘zbekistonda 2019-yilning dastlabki to‘qqiz oyi davomida mast holda avtomobil boshqarish bilan bog‘liq 25 120 ta qoidabuzarlik qayd etilgan bo‘lib, mast holda mashina haydagan 12 778 haydovchining ishi sudga oshirilgan.
IIV Axborot xizmatidan “Daryo”ga ma’lum qilishlaricha, ma’muriy sudlar qarorlariga asosan ushbu haydovchilarning 8 639 nafari (67,6 foizi) haydovchilik huquqidan mahrum etilgan, 795 nafariga esa ma’muriy qamoq jazosi tayinlangan.
Bu kabi qoidabuzarliklarga qarshi kurash samaradorligini oshirish maqsadida Sog‘liqni saqlash va Ichki ishlar vazirliklari, Oliy sud va Bosh prokuratura 2018-yil dekabrida “Transport vositalari haydovchilarining mast holatda ekanligini aniqlash tartibi to‘g‘risidagi nizomni tasdiqlash haqida”gi qo‘shma qarorni imzolagan.
Qarorga muvofiq tekshiruv ishlari alkotester moslamasi yordamida amalga oshirilmoqda. Alkotester — haydovchi tomonidan havoga chiqarilgan etanol bug‘larini aniqlovchi va tekshiruv natijalarini qog‘ozda aks ettiruvchi maxsus texnik vositadir.
Tekshiruv chog‘ida haydovchi tomonidan havoga chiqarilgan etanol bug‘lari konsentratsiyasi ko‘rsatkichi 0,135 milligramm va undan yuqori bo‘lgan hollarda yo‘l nazoratchisi tomonidan Ma’muriy javobgarlik to‘g‘risidagi kodeksining 131-moddasiga muvofiq ma’muriy bayonnoma rasmiylashtiriladi hamda transport vositasi vaqtinchalik jarima maydoniga qo‘yiladi.
Ma’muriy javobgarlik to‘g‘risidagi kodeksning 131-moddasi 1-qismiga (transport vositalarini mast holda boshqarish) muvofiq, transport vositasini boshqarish huquqidan bir yilu olti oydan uch yilgacha muddatga mahrum qilib, eng kam ish haqining 25 baravari (1 noyabr holatiga — 5 575 000 so‘m) miqdorida jarima solishga sabab bo‘ladi.
Izoh (0)