Livan bosh vaziri Saad Haririy rasman mamlakat prezidenti Mishel Aunga hukumatni iste’foga chiqarish bo‘yicha rasmiy so‘rov yubordi, deb yozmoqda “RIA Novosti”.
Avval bosh vazir Haririyning Livandagi noroziliklar sabab prezidentdan o‘zi va hukumatni iste’foga chiqarishni so‘rashi kutilayotgani xabar qilingandi.
“Konstitutsiya va mamlakat hududidagi ichki inzqiroz, xalqning norozilik namoyishlari sabab, shuningdek, men islohotlar hamda xalq manfaatlariga xizmat qiladigan yangi hukumatga zarurat bor deb hisoblaganim tufayli o‘z boshqaruvimdagi hukumatning iste’fosini so‘rayman”, — deya Haririyning iste’fo so‘rab yozgan murojaatini keltirgan nashr.
Kutilgan iste’fo Bayrutda hukumatning yangilanishi, parlamentning tarqatib yuborilishi va saylovlarning qayta o‘tkazilishini talab qilayotgan minglab norozilik namoyishi ishtirokchilarini xursand qildi.
Livan poytaxtidagi Pavshix, Riyod as-Solih maydonlaridagi olomon uylariga tarqalgani yo‘q. Fuqarolar bir-birlarini bosh vazirning ketgani bilan tabriklamoqda. Odamlar hukumatga qarshi hayqiriqlar qilishda davom etmoqda. Namoyishchilar ko‘cha yo‘llariga chodir tikib ularni to‘sib olgan.
“Biz hozircha tinchlik bilan boshlagan norozilik namoyishlarimizni to‘xtatmoqchi emasmiz. Mamlakat boshqaruvi tizimida real o‘zgarishlar kuzatilsagina uylarimizga tarqalamiz”, — deydi noroziliklar ishtirokchilaridan biri.
Livandagi aholining hukumatga qarshi norozilik namoyishlari 17-oktabrda vazirlar mahkamasining WhatsApp (oyiga 6 dollar) va boshqa ijtimoiy tarmoqlardan foydalanganlik uchun soliq solishi, tabak mahsulotlari uchun (import qutisi uchun 1,3 dollar, mahalliy quti uchun 0,5 dollar) yig‘imlar joriy etishi sabab boshlangan. Noroziliklar boshlangach Livan aloqa vaziri 18-oktabrda WhatsApp solig‘i bekor qilinganini e’lon qildi, keyinchalik Haririy boshqaruvidagi hukumat vazirlar va deputatlar maoshini 50 foizga qisqartirilishini bildirdi, ammo ushbu chora-tadbirlar ham namoyishlarni to‘xtata olmagan.Livan bosh vaziri Saad Haririy 2017-yilda ham iste’foga chiqishini e’lon qilgan va mamlakat hududini tark etgan. Keyinchalik ushbu bayonotni Saudiya Arabistoni bosimi ostida berganligini ta’kidlab, Livanga qaytgan hamda uning iste’fosi bekor bo‘lgandi.
Izoh (0)