Livanda 17-oktabrda boshlangan norozilik namoyishlari haligacha davom etmoqda. Ma’lumotlarga ko‘ra norozilik aksiyalarida aholisi 4 million bo‘lgan mamlakatning yarmidan ko‘pi 2 milliondan ko‘p odam ishtirok etmoqda. Namoyish o‘tkazayotgan fuqarolar Sa’d Haririy boshchiligidagi amaldagi hukumat iste’fosini talab qilmoqda. Namoyish faollari mamlakatdagi asosiy avtomagistral va katta shaharlar hamda poytaxtning asosiy ko‘chalarini yopib qo‘ygan. Livandagi banklar, maktab va universitetlarda ham jarayon to‘xtagan. Bu haqda “RIA Novosti” xabar berdi.
Livan banklar assotsiatsiyasi 28-oktabrda mijozlarga bankomatlar orqali xizmat ko‘rsatilishi va uskunalar fuqarolarning maoshni o‘z vaqtida olishi uchun yetarli darajada naqd pul mablag‘lari bilan ta’minlanishini e’lon qildi.
“Banklar mamlakat ko‘chalaridagi namoyishlar sabab mijozlar uchun eshik ochishdan qo‘rqmoqda. Shuningek, ular bozordagi talabni qondira olmasligi, mijozlarning depozitlarini Livan tashqarisiga olib chiqib ketishidan cho‘chimoqda”, — deya ta’kidlagan Livandagi eng katta banklardan birida yetakchi menejer bo‘lib ishlovchi Iyad Asad.
Uning so‘zlariga ko‘ra mamlakat aholisi ham banklar ochilsa, milliy valyutaning AQSh dollariga nisbati o‘zgarib ketishi va fuqarolarning moliyaviy holati og‘irlashishi mumkinligidan xavotirda. Livan Markaziy banki rahbari agar muammoga yechim topilib, ommaviy namoyishlar to‘xtatilmasa mamlakat iqtisodiyotida og‘ir inqiroz boshlanishini bildirgan.
Livan prezidenti Mishel Aun oktabr boshida davlatning moliyaviy cheklovlar va sanksiyalar sabab og‘ir ahvolda ekani va bank sektorida taqchillik kuzatilayotganini ma’lum qilgan. Dollar berish chegaralangani, xorij valyutasini naqd ko‘rinishda olish uchun komissiya foizi oshirib qo‘yilgani tadbirkorlar faoliyatida ham fuqarolarda ham bir qator moliyaviy muammolarni yuzaga keltirgan. Taqchillik AYoQSh, un tegirmonlari va farmasevtika kompaniyalari faoliyatiga salbiy ta’sir ko‘rsatmoqda.
Livanda aholining hukumatga qarshi norozilik namoyishlari vazirlar mahkamasining xalqqa WhatsApp (oyiga 6 dollar) va boshqa ijtimoiy tarmoqlarda foydalanganlik uchun soliq solishni ko‘zda tutgan qaror chiqargani, shuningdek, tamaki mahsulotlari uchun (import qutisi uchun 1,3 dollar, mahalliy quti uchun 0,5 dollar) yig‘imlar joriy etgani sabab boshlangan. Hukumat qo‘shimcha qiymat solig‘i miqdorini ham 2022-yilda 15 foizga ko‘tarmoqchi ekanligini ma’lum qilgan. Livan aloqa vaziri Muhammad Shukur 18-oktabrda WhatsApp solig‘i bekor qilinganini e’lon qildi, keyinchalik vazirlar mahkamasi vazirlar va deputatlar maoshini 50 foizga qisqartirilishini bildirdi, ammo ushbu harakatlar namoyishlarni to‘xtata olmadi.
2019-yilda Livandagi dastlabki noroziliklar aprel oxirida boshlangan va may oxirga qadar davom etgan. Bahorda o‘tkazilgan namoyishlarda kasaba qo‘mitalari hukumatning 2019-yil moliyaviy yili uchun tasdiqlangan davlat budjetida davlat organlari xodimlari va iste’fodagi harbiylarning maosh hamda ijtimoiy to‘lovlarning qisqartirganligi sabab bo‘lgandi.
Izoh (0)