Turkmanistonda xorijda o‘qiyotgan talabalarning mamlakatga yuboradigan pul o‘tkazmalariga nisbatan cheklovlar o‘rnatildi, deb xabar bermoqda “Xronika Turkmenistana”.
Joriy yilning oktabridan xorijda faqat ilk bor oliy ma’lumotli bo‘lish uchun ta’lim olayotgan talabalarning VISA bank kartalari orqali mamlakatga pul yuborishiga ruxsat etildi. Bitta oliy ta’lim muassasasidagi ta’limni yakunlab, ikkinchi mutaxassislik uchun o‘qiyotganlarga bu borada cheklov o‘rnatildi.
Yangi taqiq xorijda ta’lim olayotgan ko‘pchilik talabalarning vatanga qaytmay, Turkmaniston tashqarisida ishlash uchun qolib ketayotganligi bilan bog‘liq. Tashqarida qolishning legal yo‘llaridan biri ikkinchi mutaxassislikni egallash uchun o‘qishni yana davom ettirish, deya qayd etgan nashr.“Xronika Turkmenistana” bergan ma’lumotga ko‘ra, turkman banklaridagi manatni AQSh dollariga “qora bozor” kursidan besh baravar arzonga konvertatsiya qilishning qiyinlashishiga aynan shu cheklov sabab bo‘lgan.
Izoh (0)