Livan bosh vaziri Saad Haririyning koalitsion mahkamada o‘zi egallab turgan lavozimni tark etishi va iste’foga chiqqanini e’lon qilishi kutilmoqda. Bu haqda Al Hadath telekanali hukumatdagi manbalariga asoslanib xabar berdi, deb yozgan “TASS”.
Xabarga ko‘ra, Haririy Livan prezidenti Mishel Aun va parlament fraksiyalaridagi hamkorlari bilan aholi vakillari Bayrutdagi norozilik namoyishlarida talab qilayotgan vazirlar mahkamasidagi o‘zgarishlarni kelisha olmagan.
28-oktabr, dushanba kuni Livan Markaziy banki rahbari Riad Salom CNN telekanaliga bergan intervyusida agar muammoga yechim topilib, xalqning hukumatga ishonchsizligi davom etsa va ommaviy namoyishlar to‘xtatilmasa, mamlakat iqtisodiyotida og‘ir inqiroz boshlanishini bildirgan.
Shuningdek, Livan banklar assotsiatsiyasi 28-oktabrda mijozlarga bankomatlar orqali xizmat ko‘rsatilishi va uskunalar fuqarolarning maoshni o‘z vaqtida olishi uchun yetarli darajada naqd pul mablag‘lari bilan ta’minlanishini e’lon qilgandi. Norozilik bildirayotgan olomon Haririy iste’fosi, parlamentning tarqatib yuborilishi va muddatidan avval saylovlar o‘tkazilishini talab qilmoqda.
O‘tgan haftada namoyishchilar Mishel Aunning hukumat bilan konstruktiv dialog qilish va vazirlar mahkamasi taklif qilgan inqirozdan chiqish bo‘yicha islohotlar rejasini birga muhokama qilish bo‘yicha bildirgan taklifini rad etgan.
Livandagi aholining hukumatga qarshi norozilik namoyishlari 17-oktabrda vazirlar mahkamasining WhatsApp (oyiga 6 dollar) va boshqa ijtimoiy tarmoqlardan foydalanganlik uchun soliq solishi, tabak mahsulotlari uchun (import qutisi uchun 1,3 dollar, mahalliy quti uchun 0,5 dollar) yig‘imlar joriy etishi sabab boshlangan. Noroziliklar boshlangach Livan aloqa vaziri 18-oktabrda WhatsApp solig‘i bekor qilinganini e’lon qildi, keyinchalik Haririy boshqaruvidagi hukumat vazirlar va deputatlar maoshini 50 foizga qisqartirilishini bildirdi, ammo ushbu chora-tadbirlar ham namoyishlarni to‘xtata olmagan.
Livan bosh vaziri Saad Haririy 2017-yilda ham iste’foga chiqishini e’lon qilgan va mamlakat hududini tark etgan. Keyinchalik ushbu bayonotni Saudiya Arabistoni bosimi ostida berganligini ta’kidlab, Livanga qaytgan hamda uning iste’fosi bekor bo‘lgandi.
Izoh (0)