O‘zbekistonda 22-dekbar kuni bo‘lib o‘tadigan parlament saylovlari munosabati bilan, AQSh hududida ikkita — Vashingtondagi elchixonada 12-son va Nyu-Yorkdagi Bosh konsulxonada 33-son saylov uchastkalari tashkil etildi. Bu haqda O‘zbekistonning AQSh va Kanadadagi elchisi Javlon Vahobov ma’lum qildi, deya xabar bermoqda TIV matbuot xizmati.
Ma’lum qilishlaricha, diplomatik vakolatxonalar tomonidan AQSh va Kanada hududida vaqtincha yoki doimiy yashaydigan O‘zbekiston fuqarolari o‘rtasida saylovchilar ro‘yxatini shakllantirish bo‘yicha ishlar olib borilmoqda.
Ma’lumotlarga ko‘ra, hozirgi paytda konsullik ro‘yxatida turuvchi O‘zbekiston fuqarolarining umumiy soni 3 700 kishini tashkil etib, ularning 740 nafari Vashingtondagi O‘zbekiston elchixonasida, 2960 nafari esa Nyu-Yorkdagi Bosh konsulxonada konsullik ro‘yxatiga olingan.
Saylov uchastkalaridan uzoqda yashovchi vatandoshlarning saylovda faol ishtirokini ta’minlash uchun O‘zbekistonning AQShdagi diplomatik vakolatxonalari tomonidan diaspora tashkilotlari, jumladan Turkiston-Amerika assotsiatsiyasi (Nyu-York shahri), AQSh va Kanadaning Buxoro yahudiylari kongressi (Nyu-York shahri), Katta Filadelfiyadagi o‘zbekistonliklar hamdo‘stligi (Pensilvaniya shtati), “Vatandosh” tashkiloti (Pensilvaniya shtati), Chikago shahridagi O‘zbekiston-Amerika assotsiatsiyasi (Illinoys shtati), Atlantadagi o‘zbek jamiyati (Jorjiya shtati), Amerika davlatlaridagi O‘zbekiston yoshlar assotsiatsiyasi (Vashington shahri) va o‘zbekistonliklarning boshqa birlashmalari bilan birgalikda keng ko‘lamli tadbirlar amalga oshirilmoqda.
Bo‘lajak saylovda AQSh kuzatuvchilari ishtirokini ta’minlash uchun elchixona O‘zbekiston Senati bilan birgalikda Vashingtonda AQSh kongressmenlari, siyosiy arboblari va nohukumat tashkilotlarning ekspertlari ishtirokida qator brifinglar o‘tkazgan.
Izoh (0)