Ўзбекистонда 22-декбар куни бўлиб ўтадиган парламент сайловлари муносабати билан, АҚШ ҳудудида иккита — Вашингтондаги элчихонада 12-сон ва Нью-Йоркдаги Бош консулхонада 33-сон сайлов участкалари ташкил этилди. Бу ҳақда Ўзбекистоннинг АҚШ ва Канададаги элчиси Жавлон Ваҳобов маълум қилди, дея хабар бермоқда ТИВ матбуот хизмати.
Маълум қилишларича, дипломатик ваколатхоналар томонидан АҚШ ва Канада ҳудудида вақтинча ёки доимий яшайдиган Ўзбекистон фуқаролари ўртасида сайловчилар рўйхатини шакллантириш бўйича ишлар олиб борилмоқда.
Маълумотларга кўра, ҳозирги пайтда консуллик рўйхатида турувчи Ўзбекистон фуқароларининг умумий сони 3 700 кишини ташкил этиб, уларнинг 740 нафари Вашингтондаги Ўзбекистон элчихонасида, 2960 нафари эса Нью-Йоркдаги Бош консулхонада консуллик рўйхатига олинган.
Сайлов участкаларидан узоқда яшовчи ватандошларнинг сайловда фаол иштирокини таъминлаш учун Ўзбекистоннинг АҚШдаги дипломатик ваколатхоналари томонидан диаспора ташкилотлари, жумладан Туркистон-Америка ассоциацияси (Нью-Йорк шаҳри), АҚШ ва Канаданинг Бухоро яҳудийлари конгресси (Нью-Йорк шаҳри), Катта Филаделфиядаги ўзбекистонликлар ҳамдўстлиги (Пенсилвания штати), «Ватандош» ташкилоти (Пенсилвания штати), Чикаго шаҳридаги Ўзбекистон-Америка ассоциацияси (Иллинойс штати), Атлантадаги ўзбек жамияти (Жоржия штати), Америка давлатларидаги Ўзбекистон ёшлар ассоциацияси (Вашингтон шаҳри) ва ўзбекистонликларнинг бошқа бирлашмалари билан биргаликда кенг кўламли тадбирлар амалга оширилмоқда.
Бўлажак сайловда АҚШ кузатувчилари иштирокини таъминлаш учун элчихона Ўзбекистон Сенати билан биргаликда Вашингтонда АҚШ конгрессменлари, сиёсий арбоблари ва ноҳукумат ташкилотларнинг экспертлари иштирокида қатор брифинглар ўтказган.
Изоҳ (0)