Андижондаги трикотаж корхонасида ёнғин юз берди. Ҳодиса оқибатида ЁХБ ходими ҳалок бўлди (видео)

Андижон шаҳридаги трикотаж маҳсулотлари ишлаб чиқарувчи корхона 26 октябрга ўтар кечаси аланга ичида қолган. Мазкур ёнғинни ўчириш учун 2 соатдан ортиқ вақт кетган. Бу ҳақда вилоят ФВБ ёнғин хавфсизлиги бошқармаси матбуот хизматига таяниб «Дарё» мухбири Умиджон Мамарасулов хабар бермоқда.

Бошқарма матбуот хизмати раҳбари Азизбек Ярқуловнинг маълум қилишича, 25 октябрь куни соат 23:36 да Андижон шаҳри, Сой кўчаси, 5-уйда жойлашган кичик саноат зонаси ҳудудидаги «Dinar textile» масъулияти чекланган жамиятида ёнғин содир бўлаётганлиги тўғрисида бошқарма марказий диспетчерлик хизматига тезкор хабар келиб тушган.

Мазкур хабарга асосан ёнғин содир бўлган манзилга соат 23:40 да Андижон шаҳар ёнғин хафсизлиги бўлими 1-сонли ёнғин қутқарув қисмидаги 2 та бўлинма етиб борган. Бино 26 октябрь куни соат 00:30 да ўраб олиниб, соат 02:45 да ўчиришга эришилган.

Дастлабки ўрганишлар натижаларига кўра, биринчи ёнғин ўчириш экипажлари етиб борган вақтда қуритиш цехидаги матоларни қуритувчи ускунада бошланган ёнғин оқибатида ушбу цехнинг том қисми қулаб тушиб, ёнғин томнинг очиқ жойидан маъмурий бино, омбор ва бошқа цехларнинг том ва ички қисмларига тарқаган. Ёнғиннинг тахминий майдони 1500 квадрат метрни ташкил этган.

Динар техтиле МЧЖ маъмурий биносининг 3-қаватида ёнғинни ўчиришга жалб этилган ёнғин ўчириш экипажи бўлинма командири Ж.Н. 2-қаватга тушиб кетиб, тан жароҳати олган. Унга биринчи тиббий ёрдам кўрсатилиб, РШТЁИМ Андижон филиалига олиб борилган, бироқ кўрсатилган тиббий муолажаларга қарамасдан вафот этган.

Ҳозирда ёнғиннинг келиб чиқиш сабаблари ва етказлаган моддий зарар миқдори аниқланмоқда. Ҳолат юзасидан Андижон шаҳар прокуратураси томонидан терговга қадар текширув ишлари олиб борилмоқда.

Ёнғин туфайли корхона ишчи-хизматчилари орасида жабрланганлар бўлмагани билдирилмоқда.

Маълумот учун, корхона 2018 йилда Андижон шаҳридаги эски машинасозлик заводи ўрнида қурилган бўлиб, калавадан матоларни тўқиш, бўяш, матога ишлов бериш ва сақлаш фаолияти билан шуғулланади. Жамият 4 қаватли маъмурий бинода фаолият юритади. Айни вақтда бинонинг учинчи ва тўртинчи қаватлари фойдаланилмасдан таъмирлаш учун тайёрланаётган бўлган.