Andijon viloyat hokimligi Prezidentga videomurojaat yo‘llagan tadbirkor Yusupov ishi bo‘yicha bayonot berdi

Ijtimoiy tarmoqlarda xususiy tadbirkor Shavkat Yusupovning Prezidentga videomurojaati tarqalgani yuzasidan Andijon viloyati hokimligi rasmiy bayonot berdi.

Bundan avval Bosh prokuratura, Poytaxt IIBB ham ushbu masala yuzasidan izoh bergandi.

Qayd etilishicha, shu yilning avgust—sentabr oylarida Andijon viloyati Oltinko‘l tumanining “Uzun” ko‘cha mahalla fuqarolar yig‘ini hududidagi sobiq “Arg‘umon Oltinko‘l” chorvachilik va fermer xo‘jaligiga tegishli yer va obyektlar auksionda Shavkatbek Yusupov tomonidan sotib olingan. Biroq u mazkur joyda tadbirkorlikni yo‘lga qo‘yib, yangi ish o‘rinlari yaratish o‘rniga bor narsalarni buzilib olib chiqib sotib yuborgan.

Tadbirkor va mahalla ahli o‘rtasidagi munosabat yaxshi emasligi sababli viloyat hokimi Shuhratbek Abdurahmonov ushbu masalaga oydinlik kiritish maqsadida fermer xo‘jaligida bo‘lib, keng muhokamalar olib borilganligi hamda ko‘tarilgan ushbu masala yuzasidan sud jarayonlari ketayotgani, qonuniy yechim topish kerakligi ma’lum qilingan.

O‘tgan davr mobaynida bu masala ijtimoiy tarmoqlarda ko‘plab muhokamaga sabab bo‘lmoqda. Shu sababli Andijon viloyat hokimligi bu masala ayni vaqtda qanday holatda ekanligini bilish maqsadida Andijon viloyat prokurorining birinchi o‘rinbosari Kamoliddin Yo‘lbarsovga murojaat qilgan. Quyida Kamoliddin Yo‘lbarsov tomonidan keltirilgan javob to‘lig‘icha havola etildi.

— Yusupovning rahbarligidagi “Yuksak blok invest” MChJ Oltinko‘l tumanida joylashgan ferma bino inshootlarini auksion savdosida 326 million so‘mga sotib olgan. Sotib olingan bino inshootlar fuqaro Yusupovga tilxat asosida topshirilib, auksionga qo‘yilmagan binolar va mol-mulklar va chorva mollari tegishli tartibda olib chiqib ketilishi unga tushuntirilgan.

Biroq Yusupov auksion savdosiga qo‘yilmagan va g‘oliblik bayonnomasiga kiritilmagan fuqaro Ergashev tomonidan ijara asosida qurilgan hamda foydalanib kelinayotgan qiymati 300 million so‘mlik tayyor holdagi issiqxona binosini buzib ketib, undan chiqqan quvur hamda armatura mahsulotlarini o‘zboshimchalik bilan Namangan shahrida temir savdosi bilan shug‘ullanuvchi fuqaro Turg‘unboyevga 170 million so‘mga sotib yuborgan. Bu bilan Yusupovning harakatida sotib olingan bino va inshootlarda tadbirkorlik faoliyatini rivojlantirish emas, balki mavjud binolarni buzib ketish va talon- toroj qilish holatlari kuzatilgan.

Shuningdek, Yusupov o‘ziga tegishli bo‘lmagan bino va inshootlar belgilangan tartibda topshirilmaganligi, unga har xil to‘siqlar va tazyiqlar o‘tkazilayotganligi, qo‘li urib sindirilganligi, Namangan shahridagi xonadoniga o‘t qo‘yilganligi, uning qorovuli Toshboyevni urushganligi, natijada u vafot etganligidagi vajlari bilan ijtimoiy tarmoqlarda asossiz chiqishlar qilib kelmoqda.

Uning vajlari asossiz va tuhmatdan iborat ekanligi dastlabki tergov davomida to‘liq o‘z tasdig‘ini topdi. Bundan tashqari Yusupovga 2019-yil 9, 12, 16-oktabr kunlari tergov organlariga kelishi to‘g‘risidagi chaqiruv xatlari berilgan bo‘lsa-da, tergov organlariga kelishdan asossiz bosh tortgan. Yusupovni 15-oktabrdagi majburiy keltirish haqidagi qaror bo‘yicha ham tergovga olib kelish imkoni bo‘lmagan, shundan so‘ng Yusupovni qayerda ekanligini aniqlash bo‘yicha olib borilgan tezkor surushtiruv harakatlari davomida uni Toshkent shahri Mirobod tumanida yurganligi haqida tezkor ma’lumot olinib, 21-oktabr kuni Mirobod tumani ichki ishlar bo‘limiga Yusupovni Andijon viloyat prokuraturasiga majburiy keltirish haqida qaror yuborilgan va qaror ijrosi ta’minlanib, 22-oktabr kuni Andijon viloyat prokuraturasi tergov organiga olib kelingan.

Joriy yilning 22-oktabr kuni Yusupov Jinoyat kodeksining 167-moddasi 3-qismi “A” bandi, 168-moddasi 4-qismi “A” bandi, 169-moddasi 2-qismi “A” bandi, 232-moddasi 2-qismi, 233-moddasi 1-qismi, 237-moddasi, 238-moddasi 2-qismi, 139-moddasi 3-qismida nazarda tutilgan jinoyatlarni sodir etganligi gumonlanish tariqasida ishiga jalb qilinib, Jinoyat protsessual kodeksining 221-moddasi tartibida ushlangan.

Bundan tashqari “Arg‘umon Oltinko‘l” fermer xo‘jaligi rahbari Hamraqulovga 2019-yil 10-oktabr kuni jinoyat kodeksining 192-moddasi, 11-moddasi 1-qismi, 233-moddasi 1-qismi bilan majburiy ijro byurosi Oltinko‘l tumani bo‘lim boshlig‘i o‘rinbosari lavozimida ishlagan Bektemirovga shu kuni jinoyat kodeksining 205-moddasi 2-qismi “A ” bandi bilan ayb e’lon qilinib, ularga nisbatan garov ehtiyot choralari qo‘llanilgan. Hozirda jinoyat ishi bo‘yicha tergov harakatlari tamomlanib, sudga yuborish choralari ko‘rilmoqda.

Shuni alohida ta’kidlab o‘tish lozimki, ayblanuvchi Yusupov muqaddam 2014-yil jinoyat ishlari bo‘yicha Namangan viloyat sudining hukmiga asosan aynan shu kabi, ya’ni musodaradagi mulk va transport vositalarining auksion savdosi bilan bog‘liq sodir etgan jinoyatlari uchun,  Jinoyat kodeksining 167-moddasi 3-qismi “A” bandi, 210-moddasi 3-qismi “B” bandi, 189-moddasi 3-qismi, 209-moddasi 2-qismi “A” bandi, 168-moddasi 1-qismi, 227-moddasi 2-qismi “A” bandlari bilan aybli deb topilib, 11 yil muddatga ozodlikdan mahrum qilingan.

Bundan tashqari, Asaka tumanlararo iqtisodiy sudining 2019-yil 26-sentabrdagi hal qiluv qaroriga ko‘ra Oltinko‘l tumanidagi ferma bino inshootini Yusupov tomonidan buzib ketilganligi uchun 2019-yil 3-iyunda o‘tkazilgan elektron onlayn auksion savdosi qonunga xilof tarzda o‘kazilgan deb topilib, auksion bayonnomasi haqiqiy emas deb topilgan.

Hozirda tergov harakatlari yakunlanish arafasida bo‘lib, “Arg‘umon Oltinko‘l” fermer xo‘jaligi rahbari Hamraqulov, majburiy ijro byurosi Oltinko‘l tumani bo‘lim boshlig‘i o‘rinbosari lavozimida ishlagan Bektemirov hamda “Yuksak blog invest” MChJ rahbari Yusupovlarni ayblash haqidagi jinoyat ishi sud muhokamasiga yuborilgan.