O‘zbekistonda Sog‘liqni saqlash vazirligining ruxsatini olmasdan turib, davlat tibbiyot muassasalari hududida noqonuniy qurilish ishlarini olib borish holatlari aniqlandi, deb xabar bermoqda vazirlik matbuot xizmati.
Xususan, Samarqand viloyati Bulung‘ur tumani tibbiyot birlashmasiga qarashli “Navbahor” qishloq vrachlik punkti hududining 0,10 yer maydonida hammom va savdo majmuasini qurish uchun fuqaro Z.Aliboyevga yer ajratish bo‘yicha SSVning roziligisiz 2018-yilda Bulung‘ur tuman hokimining qarori qabul qilingan.
Ushbu holat yuzasidan Sog‘liqni saqlash vazirligi tomonidan Bosh prokuraturaga Bulung‘ur tumani hokimining qarori ustidan protest keltirilib, Bulung‘ur tumani hokimining qarori bekor qilingan. Buning natijasida qurilishi boshlangan binolarni buzish ishlari amalga oshirilmoqda.
Shuningdek, 2017-yilda Surxondaryo viloyati teri-tanosil kasalliklari dispanseri hududidagi 300 kvadrat metrdan iborat yer maydonini “Shifokor Valijon Surxon” xususiy korxonasiga ajratish bo‘yicha Termiz shahar hokimining qarori qabul qilingan.
Ushbu yer maydonining tadbirkorga berilishi va mahalliy hokimlik balansiga olinishi bo‘yicha Vazirlar Mahkamasining 2013-yil 25-fevraldagi 54-son qarori talabiga zid ravishda SSVning rozilik xati olinmagan.
Mazkur holat bo‘yicha Surxondaryo viloyati teri-tanosil kasalliklari dispanseri yer maydonini qaytarish maqsadida Termiz shahar hokimining qarori ustidan Bosh prokuraturaga protest keltirilib, Termiz shahar hokimining qarori bekor qilingan hamda noqonuniy qurilishi boshlangan binolarni buzish ishlari amalga oshirilgan.
Ma’lumot uchun, O‘zbekistonda har qanday davlat tibbiyot muassasasi hududida tadbirkorlik faoliyatini tashkil qilish amaldagi qonun va qonunosti hujjatlarida belgilangan tartibda amalga oshiriladi.
Jumladan Prezidentning 2018-yil 7-dekabrdagi “O‘zbekiston Respublikasi Sog‘liqni saqlash vazirligi faoliyatini tashkil etish chora-tadbirlari to‘g‘risida”gi qarorining 11-bandida SSVning roziligisiz davlat tibbiyot muassasalarining yer uchastkalari va ko‘chmas mulklari begonalashtirilishi taqiqlanganligi belgilangan.
Izoh (0)