Davlat bojxona qo‘mitasi “Jismoniy shaxslar tomonidan notijorat maqsadlarda tovarlarni olib o‘tish tartibini takomillashtirish to‘g‘risida”ga Prezident qarori loyihasini jamoatchilik muhokamasiga qo‘ydi.
Unga ko‘ra, 2020-yilning 1-yanvaridan O‘zbekiston davlat chegara punktlari orqali jismoniy shaxslar tomonidan olib kirilayotgan hamda fuqarolarning nomlariga xalqaro pochta jo‘natmalari orqali kelayotgan tovarlarga bojxona to‘lovi o‘rniga yagona bojxona to‘lovini joriy qilish taklif qilingan.
Shu bilan birga, bojxona to‘lovlari olinmaydigan jismoniy shaxs tomonidan respublikaga tovarlarni olib kirishning chegaraviy me’yorlaridan oshib ketganda, tovarlarning barcha toifalari uchun tovarlarning bojxona qiymatidan kelib chiqqan holda O‘zbekiston Respublikasining tashqi iqtisodiy faoliyati tovar nomenklaturasi kodidan va kelib chiqqan davlatdan qat’i nazar yagona bojxona to‘lovi olinadi. O‘zbekiston Prezidentining “Jismoniy shaxslar tomonidan tovarlarni bojxona chegarasi orqali olib o‘tishini yanada tartibga solish chora-tadbirlari to‘g‘risida” 2018-yil 6-fevraldagi PQ-3512-son qarorining 1-ilovasida ko‘rsatilgan tovarlar bundan mustasno. Shunday qilib:
- Oziq-ovqat mahsulotlari uchun — 30 foiz miqdorida, lekin kilogrammiga 2 dollardan kam bo‘lmasligi lozim;
- Nooziq-ovqat mahsulotlariga esa 50 foiz miqdorida, lekin kilogrammiga 4 dollardan kam bo‘lmasligi lozim.
Izoh (0)