O‘zbekistondagi mehmonxonalar ichida va ularga tegishli bar, mini-bar, kafe, restoranlarda alkogol mahsulotlari sotuvini yo‘lga qo‘yadigan bir necha statsionar chakana savdo nuqtasi uchun endi faqat bitta ruxsat guvohnomasi beriladi. Bu haqda Turizmni rivojlantirish davlat qo‘mitasi ma’lum qildi.
Xabar berilishicha, mazkur soddalashtirilgan tartib O‘zbekiston Respublikasi Vazirlar Mahkamasining 2019-yil 22-oktabrdagi 885-sonli qarorida belgilab qo‘yilgan.
Vazirlar Mahkamasining 2012-yil 28-martdagi 89-sonli qarori bilan tasdiqlangan nizom bo‘yicha, mehmonxonalar va ularga tegishli joylarda alkogol mahsulotlari sotuvini amalga oshiruvchi barcha umumiy ovqatlanish joylarining har biri alohida ruxsat guvohnomasi olishi kerak edi.
Qo‘mita tomonidan ta’kidlanishicha, bir necha ruxsat guvohnomasi olish tartibining bekor qilinishidan asosiy maqsad mehmonxona biznesida ko‘rsatilayotgan xizmatlarni yanada yaxshilash va ularning sifatini zamonaviy standartlar hamda talablarga muvofiq oshirishdan iboratdir.
Izoh (0)