Kosonlik Fazilat Normurodovaning ijtimoiy tarmoqlarda tarqalgan murojaati Qashqadaryo viloyat sog‘liqni saqlash boshqarmasi tomonidan o‘rganildi. Bu haqda “Daryo”ga Qashqadaryo viloyat sog‘liqni saqlash boshqarmasi axborot xizmati rahbari Nuriddin Egamov xabar bermoqda.
Koson tug‘ruq kompleksining tug‘ruq bo‘limi 2019-yil 1-oktabrdan 20-oktabrgacha yillik joriy ta’mirlash uchun reja asosida yopilgan. Shu sababli tug‘ruq kompleksi ginekologiya bo‘limida tug‘ruq zali tashkil etilib, fiziologik tug‘ruqlar olib borilgan. Bu haqda tuman va viloyat tibbiyot tashkilotlariga xabar qilingan.
2019-yil 14-oktabr kuni murojaat mualliflaridan biri Fazilat Normurodovaning kelini Gulchiroy Qayumova Koson tumani tibbiyot birlashmasiga qarashli tug‘ruq kompleksiga keltirilgan. Unga homiladorlik II, tug‘ruq II, 40 hafta muddatdagi tug‘ruq tashxisi qo‘yilgan.
Ayol 2019-yil 14-oktabr kuni soat 12:05 da ginekologiya bo‘limidagi tashkillashtirilgan tug‘ruq zalida o‘g‘il farzandni dunyoga keltirgan. Chaqaloqning vazni 3,6 kilogrammni, bo‘yi 54 santimetrni tashkil qilgan. Shu kuni soat 17:10 da shifokorlarning qarshiligiga qaramasdan, chaqaloqning yaqinlari gepovaks vaksinasini oldirmasdan turib, uni uyga olib ketgan. Bu vaqtda chaqaloqning umumiy ahvoli yaxshi bo‘lgan.
Chaqaloq 15-oktabr kuni rejali ravishda olinishi kerak bo‘lgan gepovaks vaksinasini olish uchun tug‘ruq kompleksiga olib kelingan. Kelganida neonatolog shifokor, chaqaloqlar bo‘limi boshlig‘i Dilfuza Hasanova tomonidan ko‘rilib, umumiy ahvoli yaxshiligi va vaksina olishga qarshi ko‘rsatmalari bo‘lmaganligi uchun vaksinatsiyaga ruxsat berilgan, asoratlari tushuntirilgan va emlash amalga oshirilgan. Chaqaloqning umumiy ahvoli qoniqarli bo‘lgan. Onasining gapiga ko‘ra, kechasi bezovta bo‘lmagan.
Ma’lum qilinishicha, murojaat muallifining “tug‘ruqxona binosini ta’mirlash uchun pul so‘radi” degan da’volari asossiz. Tug‘ruq kompleksi binosi mahalliy budjet hisobidan ta’mirlanmoqda.
Tug‘ruqxonada fiziologik tug‘ruqlar uchun birlamchi dori vositalari mavjud. Gulchiroy Qayumovaga va uning chaqalog‘iga ham tug‘ruqxonada bor dori-darmonlar ishlatilgan. Hech kimdan hech qanday dori uchun pul so‘ralmagan, deyiladi boshqarma xabarida.
16-oktabr kuni ertalab soat 10:10 da Gulchiroy Qayumovaning chaqalog‘ini buvisi Fazilat Normurodova ko‘tarib BSJ vaksinasini emlatish uchun tug‘ruq kompleksidagi emlash xonasiga olib kelgan. U emlash hamshirasi chaqaloqlar bo‘limi boshlig‘i Dilfuza Hasanova va doya Sohiba Jo‘rayevani chaqirtirgan. Ular chaqaloqni ko‘rib, ahvoli yaxshi emasligini, rangi ko‘kimtirligini, tezda uni bolalar shifoxonasiga olib borish kerakligini aytgan. Bolaning ahvoli yaxshi bo‘lmaganligi sababli u BSJ vaksinasi bilan emlanmagan.
Shundan so‘ng bolaning yaqinlari o‘zlarining mashinasida uni viloyat ko‘p tarmoqli bolalar tibbiyot markaziga o‘ta og‘ir ahvolda olib borgan. Chaqaloqlar reanimatsiyasi bo‘limida ko‘rsatilgan tibbiy yordamga qaramasdan, taxminan 15 daqiqadan so‘ng biologik o‘lim sodir bo‘lgan. O‘lim sababi — homila ichi infeksiyasi, sepsis, miyakomasi, miya shishi.
Ta’kidlanishicha, chaqaloq 15-oktabr kuni kechasi bezovta bo‘lganida uni shifoxonaga olib kelish o‘rniga mahalliy qishloq tabibiga olib borilgan, buni chaqaloqning buvisi shifokorlarning yonida aytgan. Chaqaloqni o‘z vaqtida shifokorga ko‘rsatmasdan, uyida ushlab turish uning ahvoli og‘irlashishiga sabab bo‘lgan.
Murojaatda qayd qilingan “sentabr—oktabr oylarida mazkur tug‘ruq kompleksida jami 5 nafar go‘dak o‘limi sodir bo‘ldi”, degan da’vo o‘z isbotini topmagan. Bu muddat davomida tug‘ruq kompleksida bironta ham go‘dak o‘limi qayd etilmagan.
Koson tumani tibbiyot birlashmasining navbatdan tashqari tibbiy kengashida mazkur vaziyat atroflicha muhokama qilingan. Aniqlanishicha, tug‘ruq kompleksi chaqaloqlar bo‘limi boshlig‘i, neonatolog Dilfuza Hasanova, doya Sohiba Karimova, bosh shifokor o‘rinbosari Davlat Sultonov bu borada mas’uliyatsizlik qilgan, ya’ni chaqaloqqa gepovaks vaksinasini olmasdan turib uning uyga olib ketilishiga yo‘l qo‘ygan.
Shu sababli Dilfuza Hasanova va Sohiba Karimova egallab turgan vazifalaridan ozod etilgan, Davlat Sultonov eng kam oylik ish haqining 30 foizi miqdorida jarimaga tortilgan.
Izoh (0)