Samarqand viloyati Pastdarg‘om tumani “Dimishqibola” mahallasida joylashgan “Darg‘om Parranda Fayz” MChJga tegishli parrandachilik fermasida yong‘in sodir bo‘ldi. Davlat yong‘in xavfsizligi xizmatining yozishicha, yong‘in haqida 23-oktabr, chorshanba kuni soat 19:15 da xabar kelib tushgan.
Voqea joyiga 4 ta yong‘in o‘chirish bo‘linmasi jalb etilgan. Bo‘linmalar chaqirilgan manzilga 16 daqiqada yetib borgan (eng yaqin yong‘in-qutqaruv qismigacha masofa 16 kilometr) va yong‘in soat 19:50 da o‘rab olinib, soat 21:50 da bartaraf etilgan.
Hodisa oqibatida 8 mingtaga yaqin jo‘jalar nobud bo‘lgan va parrandachilik fermasining 150 kvadrat metr maydonda tomi, shifti yonib zararlangan. Tan jarohati olgan va halok bo‘lgan insonlar qayd etilmagan. Yong‘indan fabrikaning 550 kvadrat metr maydoni hamda 16 mingtadan ortiq jo‘ja saqlab qolingan.
Yong‘inga qo‘lbola isitish moslamasidan foydalanish sabab bo‘lgan deb taxmin qilinmoqda. Moddiy zarar miqdori aniqlanmoqda.
Izoh (0)