Shavkat Mirziyoyev Chilonzordagi “Oriyent keramik” sanoat korxonasiga tashrif buyurdi. Prezident matbuot xizmatining xabar berishicha, davlat rahbari 2017-yilda Chilonzor tumaniga tashrifi chog‘ida ushbu korxona loyihasini ma’qullagan.
Shundan so‘ng foydalanilmayotgan yerda zamonaviy bino qurilib, xorijdan keramika mahsulotlari va kafel ishlab chiqaradigan uskunalar keltirib o‘rnatilgan.
Korxona 2019-yil iyul oyida ish boshlagan. Uning umumiy qiymati qariyb 14 million dollar bo‘lib, yiliga 3,6 million kvadrat metr keramik mahsulotlar ishlab chiqarish quvvatiga ega. Prezident korxonaning ish jarayoni bilan tanishib, mahsulot turlarini ko‘zdan kechirdi.
Qayd etilishicha, mahsulotlar deyarli yuz foiz mahalliy xomashyodan tayyorlanmoqda. Shu sababli, xorijnikidan bir necha barobar arzon narxlarda ichki bozorga chiqarilmoqda. Shuningdek, ularning 30 foizi Qozog‘iston, Tojikiston, Qirg‘iziston va Afg‘onistonga sotilmoqda. Birgina iyul—avgust oylarida 500 ming dollarlik mahsulot eksport qilingan. Ayni paytda bu yerda 270 nafar ishchi va mutaxassis ishlaydi.
Mavzuga doir: Shavkat Mirziyoyev metropolitenning Yunusobod yo‘nalishida olib borilayotgan qurilish ishlari bilan tanishdi (foto)
Prezident tashrifi davomida korxona tomonidan 2020—2021-yillarda amalga oshirilishi rejalashtirilgan loyiha haqida ma’lumot berilgan. Unga ko‘ra, hozirda O‘zbekistonga import qilinayotgan katta o‘lchamdagi keramogranit kafellar ishlab chiqarish yo‘lga qo‘yiladi. Yana 700 ta ish o‘rni yaratiladi.
Shuningdek, Toshkentda sanoat va xizmat ko‘rsatish sohalarida amalga oshirilishi rejalashtirilgan loyihalar taqdimoti ham o‘tkazilgan.
Izoh (0)