Qo‘qon hokimligi qabriston devori nurab, hatto jasad suyaklari ko‘rinayotgani haqidagi xabarga munosabat bildirdi

Qo‘qon shahridagi “Katta” qabriston devori holati yuzasidan ijtimoiy tarmoqlarda tarqatilgan xabar yuzasidan Qo‘qon shahar hokimligi munosabat bildirdi.

Xabarlarda qabriston devorlari nurab qulay deb qolgani, hatto jasadlar suyagi ko‘rinib qolgani aytilgan. Shuningdek, qabristonga chegaradosh yerda mahalla bolalari o‘ynashi, ularni devor bosib qolishidan odamlar xavotirda ekanligi bildirilgan.

Qayd etilishicha, shu yilning 18-oktabr kuni, soat 03:20 larda 18-MFY hududida joylashgan “Katta” qabristonning Mehnatobod ko‘chasi bilan tutash bo‘lgan tomonining taxminan 6—7 metr uzunlikdagi qism fundamenti deformatsiyasi natijasida qulab tushgan.

Shu kuniyoq qabriston ma’muriyati jamoatchilik bilan birgalikda qulab tushgan devor atrofini tozalab, tiklash ishlarini boshlab yuborgan.

Hozirgi kunda devorni tiklash ishlari davom etmoqda. Qabr va sag‘analarga ziyon yetmagan.