O‘zbekiston milliy valyutasiga ishonchni oshirish uchun inflyatsiyaning eng past ko‘rsatkichi — 5 foizga erishish kerak. “Gazeta.uz”ning xabar berishicha, bu haqda Markaziy bank raisining birinchi o‘rinbosari Ilhom Norqulov 21-oktabr kuni bo‘lib o‘tgan matbuot anjumanida ta’kidlagan.
Avvalroq xabar berilganidek, Markaziy bank pul-kredit siyosati sharoitlarini inflyatsion targetlash rejimiga o‘tkazishni rejalashtirgandi. 2023-yilga kelib inflyatsiyaning doimiy maqsadli ko‘rsatkichi (target)ni 5 foiz darajasida belgilanishi mumkin.
O‘tgan yilning dekabr oyida Markaziy bankning pul-kredit siyosati departamenti direktori Behzod Hamroyev inflyatsiyani maqsadli belgilashga o‘tish iqtisodiyotni demonopolizatsiya qilishni va bozor narxlarini shakllantirish uchun shart-sharoitlarni yaratishni taqozo etishini ta’kidlagan.
O‘zbekistonning ko‘plab sohalarida, shu jumladan temir yo‘l, aviatsiya, telekommunikatsiya va boshqa sohalarda, alohida kompaniyalarning monopol mavqeyi saqlanib qolgan. Markaziy bank qulay fursatni poylamasdan shu yilning oxirigacha inflyatsion targetlash rejimiga o‘tishga qaror qildi, bu esa hukumatni yanada qat’iy choralar ko‘rishga undaydi.
“Milliy valyutaga ishonchni mustahkamlash uchun inflyatsiyaning juda past darajasi talab etiladi. Bizning tahlillarimiz shuni ko‘rsatadiki, ushbu daraja 5 foizdan yuqori bo‘lmasligi kerak. Agar u 9 foiz bo‘lsa, bu yuqori inflyatsiya bo‘lib, siz keyingi 2—3 yil uchun so‘mdagi xarajatlar borasida qandaydir rejalar, prognozlar qilishga ikkilanasiz”, — deb ta’kidlagan Ilhom Norqulov.
Narxlar o‘sishining yuqori dinamikasi tashqi qarzlar va budjet taqchilligining oshishiga ta’sir qiladi, — degan u.
Qayd etilishicha, Markaziy bank inflyatsion targetlash rejimiga 2019-yil yakunidayoq o‘tish lozim. Bu hukumat va Markaziy bankning say-harakatlarini inflyatsiyani pasaytirishga yordam beradi.
Izoh (0)