Pensiya haqida to‘liq ma’lumot beruvchi yangi interaktiv davlat xizmati ishga tushirildi

Loyiha boshqaruvi milliy agentligi huzuridagi Elektron hukumat va raqamli iqtisodiyot loyihalarini boshqarish markazi, Yagona integrator UZINFOCOM hamda O‘zbekiston Moliya vazirligi huzuridagi budjetdan tashqari Pensiya jamg‘armasi tomonidan, pensiya (nafaqa) haqida to‘liq ma’lumot beruvchi yangi interaktiv davlat xizmati ishga tushirildi. Bu haqda Loyiha boshqaruvi milliy agentligi xabar berdi.

Yagona interaktiv davlat xizmatlari portali orqali onlayn tarzda quyidagi ma’lumotlarni bilib olish mumkin: pensiya (nafaqa) miqdori, tayinlangan sanasi, to‘lash muddati, ish staji davomiyligi, nafaqa turi, tanlangan muddat bo‘yicha to‘lovlar miqdori, shuningdek, hisoblangan va hisoblanmagan ish staji haqida ma’lumotlar. Barcha kerakli ma’lumotlarni real vaqt rejimida hech qanday qo‘shimcha hujjatlarsiz olishingiz mumkin.

Ushbu xizmat Yagona interaktiv davlat xizmatlari portalining “Ijtimoiy ta’minot” bo‘limida keltirilgan bo‘lib, jismoniy shaxslar (pensiya/nafaqa oluvchilar) uchun bepul taqdim etiladi.