Investitsiyalar asosan infratuzilmasi yetarli darajada bo‘lgan hududlarga kiritilmoqda, chekka hududlar esa e’tibordan chetda qolmoqda. Bu haqda Andijon viloyati hokimi Shuhrat Abdurahmonov 19-oktabr kuni Open Andijan xalqaro investitsiya forumi doirasida OAV vakillari bilan bo‘lib o‘tgan ochiq muloqotda aytib o‘tdi, deya xabar bermoqda “Daryo” muxbiri Musulmonbek Ibrohimov.
Anjumanda “Daryo” muxbiri Open Andijan xalqaro investitsiya forumida Andijon viloyatining ishsizlik darajasi yuqori va sanoati rivojlanmagan tumanlariga investorlarni jalb qilish ishlari qay darajada olib borilgani haqidagi savol bilan viloyat hokimiga murojaat qildi.
Hokimning so‘zlariga ko‘ra, Prezident Shavkat Mirziyoyev may oyida Andijonga qilgan safari davomida viloyatning sanoati rivojlanmagan, ishsizlik darajasi yuqori bo‘lgan tumanlarida yangi loyihalarni ishga tushirish vazifasini qo‘ygan.
“Har bir shahar va tumanda investorlar uchun qanday zaxiralar borligini aniqlash rejalashtirilgan. Masalan, Xo‘jaobod, Buloqboshi, Marhamat tumanlari tog‘oldi hududlari bo‘lib, u yerlar sement, marmar va boshqa qurilish materiallarini ishlab chiqarish uchun qulay. Ayrim tumanlarda meva-sabzavot yetishtiriladi, lekin uni qayta ishlash 5—10 foizdan oshmaydi”, — dedi Shuhrat Abdurahmonov.
Uning ta’kidlashicha, investor kelishi uchun birinchi navbatda infratuzilma — elektr energiyasi, yo‘l, gaz, suv kerak. Lekin sanab o‘tilgan ushbu qulayliklar viloyatning barcha tumanlarida ham yo‘q.
“Tan olaman, hamma tumanlarda sharoit bir xil, infratuzilma gullab ketgan, deb aytolmayman. Shu bois investorlar shahar atrofiga ko‘proq, chekka hududlarga esa kamroq kirib kelmoqda. Ishsizlik yuqori va sanoati past bo‘lgan tumanlarga investorlarni jalb qilishga harakat qilyapmiz. Bu faqat bizga bog‘liq emas, investorlarning ham o‘z tanlovi bor”, — dedi viloyat rahbari.
Izoh (0)