Turkiyalik ishbilarmonlarga avval qo‘yilgan to‘siqlar tufayli ular orasida O‘zbekistonga qaytib kelmaydigan bo‘lib ketganlari ham bor. Bu haqda Andijon viloyati hokimi Shuhrat Abdurahmonov 19-oktabr kuni Open Andijan xalqaro investitsiya forumi doirasida OAV vakillari bilan bo‘lib o‘tgan ochiq muloqotda aytib o‘tdi, deya xabar bermoqda “Daryo” muxbiri Musulmonbek Ibrohimov.
Anjumanda jurnalistlardan biri Andijon viloyatida investorlar emin-erkin faoliyat yuritishi uchun qanday kafolat borligi haqida viloyati hokimi Shuhratbek Abdurahmonovga savol bilan murojaat qildi.
Savolga javob berarkan, hokim ilgari turkiyalik ko‘plab tadbirkorlar Toshkentda ham, viloyatlarda ham ishni yurgiza olmay, “bular yolg‘onchi, aldaydi, O‘zbekistonga qaytib kirmayman”, deb ketganini eslatdi.
Mavzuga doir: Andijondagi xalqaro forumda 250 mln dollarlik loyihalarni amalga oshirish bo‘yicha shartnomalar imzolandi
“Avvallari hokimlarning asosiy vaqti qishloq xo‘jaligi bilan o‘tardi. Klaster tizimi joriy etilgach, paxta ham bir yo‘singa tushdi. Tarixda bo‘lmagan — 29 kunda paxta rejasini bajardik. Endi haftaning uch kunida mahalliy tadbirkormi, xorijiy investormi, farqi yo‘q, har biri bilan uchrashib, muammolarini yechishga harakat qilyapmiz”, — dedi hokim Abdurahmonov.
Mavzuga doir: Andijon hokimi Shuhrat Abdurahmonov: “Jurnalistika birinchi hokimiyat darajasiga ko‘tarildi”
“Qanday masalasi bo‘lsa, yelkamga olib, 50 ming dollarlik loyiha olib kirayotgan bo‘lsa ham, o‘zim kafil bo‘lyapman. Albatta, qonuniy yo‘l bilan. Hali: ‘Hamma joy tozalanib ketdi’, deb aytolmayman. Tamagirlik holatlari bo‘lmasligi va boshqa turli muammolarning oldini olish uchun investorlar bilan shaxsan o‘zim uchrashyapman”, — dedi hokim.
Izoh (0)