Туркиялик ишбилармонларга аввал қўйилган тўсиқлар туфайли улар орасида Ўзбекистонга қайтиб келмайдиган бўлиб кетганлари ҳам бор. Бу ҳақда Андижон вилояти ҳокими Шуҳрат Абдураҳмонов 19 октябрь куни Open Andijan халқаро инвестиция форуми доирасида ОАВ вакиллари билан бўлиб ўтган очиқ мулоқотда айтиб ўтди, дея хабар бермоқда «Дарё» мухбири Мусулмонбек Иброҳимов.
Анжуманда журналистлардан бири Андижон вилоятида инвесторлар эмин-эркин фаолият юритиши учун қандай кафолат борлиги ҳақида вилояти ҳокими Шуҳратбек Абдураҳмоновга савол билан мурожаат қилди.
Саволга жавоб бераркан, ҳоким илгари туркиялик кўплаб тадбиркорлар Тошкентда ҳам, вилоятларда ҳам ишни юргиза олмай, «булар ёлғончи, алдайди, Ўзбекистонга қайтиб кирмайман», деб кетганини эслатди.
Мавзуга доир: Андижондаги халқаро форумда 250 млн долларлик лойиҳаларни амалга ошириш бўйича шартномалар имзоланди
«Авваллари ҳокимларнинг асосий вақти қишлоқ хўжалиги билан ўтарди. Кластер тизими жорий этилгач, пахта ҳам бир йўсинга тушди. Тарихда бўлмаган — 29 кунда пахта режасини бажардик. Энди ҳафтанинг уч кунида маҳаллий тадбиркорми, хорижий инвесторми, фарқи йўқ, ҳар бири билан учрашиб, муаммоларини ечишга ҳаракат қиляпмиз», — деди ҳоким Абдураҳмонов.
Мавзуга доир: Андижон ҳокими Шуҳрат Абдураҳмонов: «Журналистика биринчи ҳокимият даражасига кўтарилди»
«Қандай масаласи бўлса, елкамга олиб, 50 минг долларлик лойиҳа олиб кираётган бўлса ҳам, ўзим кафил бўляпман. Албатта, қонуний йўл билан. Ҳали: ‘Ҳамма жой тозаланиб кетди’, деб айтолмайман. Тамагирлик ҳолатлари бўлмаслиги ва бошқа турли муаммоларнинг олдини олиш учун инвесторлар билан шахсан ўзим учрашяпман», — деди ҳоким.
Изоҳ (0)