“Paxtakor—Yangiyer” magistral gaz quvurida yorilish sodir bo‘ldi

“Paxtakor—Yangiyer” magistral gaz quvurida yorilish sodir bo‘ldi, deya xabar bermoqda “O‘ztransgaz” matbuot xizmati.

Qayd etilishicha, 21-oktabr, dushanba kuni soat taxminan 09:47 da “G‘allaorol magistral gaz quvurlari boshqarmasi”ga qarashli 1984-yilda ishga tushirilgan yuqori bosimli diametri 1020 millimetr bo‘lgan “Paxtakor—Yangiyer” magistral gaz quvuri I tarmog‘ining 17 kilometrida yong‘insiz holatda quvur yorilishi yuz bergan.

Xabarda aytilishicha, hozirda avariyani bartaraf etish va magistral gaz quvurni ishga tushirish choralari ko‘rilmoqda, iste’molchilarga tabiiy gaz yetkazib berishda uzilishlar bo‘lmaydi.

Sentabr oyida Zangiota tumanida “Obod qishloq” dasturi doirasidagi ishlar vaqtida gaz quvuri shikastlanib, 500 taga yaqin xonadon gazsiz qolgan edi.