17-oktabr, payshanba kuni respublika shoshilinch tibbiy yordam ilmiy markazi Qashqadaryo filiali xirurgiya bo‘limiga tish tozalayotgan vaqtda igna yutib yuborgan bemor yotqizildi. Bu haqda “Daryo”ga viloyat Sog‘liqni saqlash boshqarmasi axborot xizmati ma’lum qildi.
Xabar berilishicha, bemor 19 yoshli g‘uzorlik Ozod Normatov bo‘lgan.
Filialda ushbu operatsiyani amalga oshirish imkoniyati yo‘qligi sababli, respublika shoshilinch tibbiy yordam ilmiy markazi bilan kelishuv asosida bemor viloyat ko‘p tarmoqli tibbiyot markazi neyroxirurgiya bo‘limiga o‘tkazilgan. Unga bo‘yin umurtqasining uchinchisida, chap yon tomonida yot jism (igna) borligi tashxisi qo‘yilgan.
Bo‘limda o‘tkazilgan konsiliumdan so‘ng 19-oktabr, shanba kuni bemorda elektro-optika preobrazovatel apparati yordamida shifokorlar Soat Temirov va Suvon Berdiyev tomonidan jarrohlik amaliyoti o‘tkazilgan. Mazkur uskuna yordamida hech qanday asoratsiz, qon tomir va nerv tomirlarga zarar bermagan holda igna olib tashlangan.
Viloyat ko‘p tarmoqli tibbiyot markazi bosh shifokori To‘lqin Rasulovning ma’lum qilishicha, bunday amaliyot viloyatda, xususan, mazkur tibbiyot markazida EOP apparati yordamida birinchi marta muvaffaqiyatli tarzda amalga oshirilgan.
Ayni paytda bemor o‘zini yaxshi his qilayotgani xabar qilinmoqda.
Eslatib o‘tamiz, 2018-yilning yanvar oyida farg‘onalik 11 oylik bolaning tanasida 15 igna topilgan va ularning 12 tasi olib tashlangan edi. Ignalar bolaning tanasiga tashqi tomondan tiqilgani ma’lum bo‘lgan va bu holat bo‘yicha Farg‘ona viloyati prokuraturasi tomonidan jinoyat ishi ochilgan edi.
Izoh (0)