“Rossiya temir yo‘llari” kompaniyasi kelasi yili O‘zbekistondagi “Buxoro—Urganch—Xiva” temiryo‘l yo‘nalishini elektrlashtiradi. Bu haqda kompaniya direktorining birinchi o‘rinbosari Aleksandr Misharin Hamdo‘stlikka a’zo mamlakatlar temiryo‘l transporti Kengashining 71-yig‘ilishida jurnalistlarga ma’lum qildi, deb yozadi “TASS”.
“Bu ishni keyingi yilga mo‘ljallayapmiz. Umid qilamanki, juda yaqin orada shartnoma imzolaymiz. Hozir uning qiymatini aniqlashtiryapmiz”, — dedi Misharin.
Joriy yilning sentabr oyida mazkur kompaniya O‘zbekistondagi infratuzilmalar loyihasida qatnashishni rejalashtirayotgani haqida xabar bergan edi.
Hamdo‘stlikka a’zo mamlakatlar temiryo‘l transporti Kengashi 1992-yil 14-fevralda MDH davlatlari temiryo‘l transportini kuzatib borish haqidagi hukumatlararo shartnoma bilan tuzilgan.
Kengashga Hamdo‘stlikka a’zo barcha davlatlarning temiryo‘l sohasidagi boshqaruv organlari rahbarlari kirgan. Shuningdek, uning ishida Boltiqbo‘yi mamlakatlari, Bolgariya va Finlyandiya ham ishtirok etadi. Kengash bir yilda ikki marta yig‘iladi.
Izoh (0)