«Россия темир йўллари» компанияси келаси йили Ўзбекистондаги «Бухоро—Урганч—Хива» темирйўл йўналишини электрлаштиради. Бу ҳақда компания директорининг биринчи ўринбосари Александр Мишарин Ҳамдўстликка аъзо мамлакатлар темирйўл транспорти Кенгашининг 71-йиғилишида журналистларга маълум қилди, деб ёзади «ТАСС».
«Бу ишни кейинги йилга мўлжаллаяпмиз. Умид қиламанки, жуда яқин орада шартнома имзолаймиз. Ҳозир унинг қийматини аниқлаштиряпмиз», — деди Мишарин.
Жорий йилнинг сентябрь ойида мазкур компания Ўзбекистондаги инфратузилмалар лойиҳасида қатнашишни режалаштираётгани ҳақида хабар берган эди.
Ҳамдўстликка аъзо мамлакатлар темирйўл транспорти Кенгаши 1992 йил 14 февралда МДҲ давлатлари темирйўл транспортини кузатиб бориш ҳақидаги ҳукуматлараро шартнома билан тузилган.
Кенгашга Ҳамдўстликка аъзо барча давлатларнинг темирйўл соҳасидаги бошқарув органлари раҳбарлари кирган. Шунингдек, унинг ишида Болтиқбўйи мамлакатлари, Болгария ва Финляндия ҳам иштирок этади. Кенгаш бир йилда икки марта йиғилади.
Изоҳ (0)