O‘zbekistonda xususiy tug‘ruq komplekslarini tashkil etish taklif qilindi

“Mening fikrim” jamoaviy murojaatlar portaliga xususiy tug‘ruq komplekslarini tashkil etish to‘g‘risida taklif joylashtirildi.

Taklifda aholi soni tobora ortib borayotgan vaqtda sifatli va qulay tibbiy xizmatga bo‘lgan talab ham oshib borayotgani ta’kidlangan.

“Mamlakatimizda tug‘ruqlar soni yildan-yilga ko‘payib bormoqda. Bu quvonarli hol, albatta. Biroq tug‘ruq vaqtida tibbiy xizmatning sifat darajasi va tug‘ruq maskanlarining uzoqligi chekka viloyatlarda turli noqulayliklarni keltirib chiqarmoqda. Ona va bola salomatligini saqlash ustuvor ahamiyat kasb etar ekan, bu borada xususiy tug‘ruq komplekslarini tashkil etish ayni muddao hisoblanadi. Hozirda zamonaviy, qulay va sifatli tibbiy xizmat ko‘rsatadigan xususiy tug‘ruq maskanlariga ehtiyoj katta”, — deyiladi taklifda.

“Shu sababli yuqoridagilarni inobatga olgan holda xususiy tug‘ruq komplekslari tashkil etilishini taklif qilamiz”, — deb yozadi petitsiya muallifi.