Давлатга хиёнатда айбланган ва 10 йилга озодликдан маҳрум қилинган Хитой бўйича мутахассис Константин Сироежкин Қозоғистон фуқаролигидан ҳам маҳрум бўлди. У озодликка чиққанидан кейин мамлакат ташқарисида ҳаёт кечиради. Бу ҳақда Олмаота суди ахборот хизмати маълумоти асосида «РИА Новости» хабар берган.
Аввал Қозоғистон хавфсизлик хизмати 2019 йил бошида ҳибсга олинган Сироежкиннинг Олмаота туманлараро махсус суди қарорига кўра давлатга хиёнат қилгани учун 10 йилга озодликдан маҳрум қилинганини билдирган.
«Суд уни Қозоғистон Республикаси фуқаролигидан ҳам маҳрум қилди», — дейилган шаҳар судининг ахборот хизмати хабарида.
Айбланувчи жазони ижро этишнинг кучайтирилган тартибли муассасасида ўтайди. «Константин Сироежкин жазо муддатини ўтаб бўлганидан сўнг, у давлат ҳудудини тарк этади ва ушбу шахснинг мамлакат ҳудудига киришига 5 йилгача рухсат берилмайди», — дейилади суд берган маълумотда.
63 ёшли Сироежкин ҳибсга олингунига қадар Қозоғистон президенти ҳузуридаги Стратегик тадқиқотлар институтида қарийб 13 йил ишлаган. У рус, инглиз ва хитой тилларида чоп этилган кўплаб китоблар ва мақолалар муаллифи ҳисобланади.
Изоҳ (0)