Parijda taniqli fransuz aktyori Jerar Deparde ishtirokida film suratga olish masalalari muhokama qilindi. Bu haqda “O‘zbekkino” milliy agentligi matbuot xizmati “Daryo”ga xabar berdi.
10-oktabr, payshanba kuni dunyoga mashhur fransuz aktyori Jerar Depardyening Parij qarorgohida “Buyuk ipak yo‘li” nomi ostidagi loyiha ishtirokchilarining O‘zbekiston haqida hujjatli film ishlash hamda uni Fransiya va O‘zbekiston telekanallarida namoyish etish bo‘yicha uchrashuv bo‘lib o‘tdi.
Uchrashuvda O‘zbekistonning Fransiyadagi elchisi S. Rustamboyev, “O‘zbekkino” rahbari Firdavs Abduxoliqov va B-Tween Production kompaniyasi bosh direktori Arno File ishtirok etdi. O‘zbekiston Turizmni rivojlantirish Davlat qo‘mitasi va “O‘zbekiston havo yo‘llari” Milliy aviakompaniyasi ham ushbu loyihaning hammualliflari hisoblanadi.
Tomonlar film loyihasining amaliy jihatlarini muhokama qildi. Film mualliflarining fikriga ko‘ra, bosh qahramon Jerar Depardye butunlay yangi qiyofada tomoshabinlarga mutlaqo yangi yondashuv taqdim etadi. Shunday qilib, odatiy yo‘nalish va mashqlardan uzoqlashgan holda film fransuz tomoshabinlari uchun O‘zbekistonning yangi noma’lum qirralarini ochish vazifasini qo‘yadi.
Shu maqsadda loyiha tashkilotchilari O‘zbekistonning eng g‘ayrioddiy va sirli joylarida suratga olish ishlarini rejalashtirgan. Bu Amudaryo bo‘yidagi noyob — Oks Iskandariyasi, Budda va Kushon yodgorliklari, masalan, Fayoztepa, Avliyo Doniyor hamda uch payg‘ambar maqbaralari va boshqalar. Filmda ta’limda islom dinining roli va mohiyatiga alohida e’tibor beriladi.
“Uchrashuvimiz Fransiya va O‘zbekiston prezidentlari Parijda bo‘lib o‘tgan uchrashuvning yubileyi munosabati bilan o‘tayotgani ramziy ma’noga ega. Bugun O‘zbekistonda amalga oshirilayotgan noyob islohotlar va ochiqlik siyosati barchaga ma’lum. Prezident Shavkat Mirziyoyev va uning islom dini ezgulik, tinchlik, bunyodkorlik va bag‘rikenglik dini ekanligini dunyoga yetkazishga qaratgan sa’y-harakatlari meni ta’sirlantirdi”, — dedi aktyor Jerar Depardye o‘z uyida mehmonlarni qabul qilar chog‘ida.
“Bilasizmi, bu mening shaxsiy qarashlarimga mos keladi, chunki men islomni siyosiy va xudbin maqsadlarda ishlatib bo‘lmaydi, deb hisoblayman. Filmning katta auditoriyasi boy tarixga ega, betakror tabiat, samimiy va mehmondo‘st xalq bo‘lgan yangi jo‘shqin O‘zbekistonni ochish uchun berilgan imkoniyatlar meni ilhomlantirdi.
Ushbu mamlakatga safarimni sabrsizlik bilan kutyapman. Mamlakatingiz o‘zining boy madaniy va ma’naviy merosini asrab-avaylash borasida keng ko‘lamli ishlarni amalga oshirmoqda. Bu tamaddunlar, imperiyalar, dinlar va madaniyatlarning uyg‘unlashuvidir. O‘zbekistonning o‘z merosiga nisbatan bunday ehtiromi tahsinga loyiq va alohida hurmatni talab etadi”, — dedi u.
Shuningdek, taniqli aktyor Jerar Depardyega “O‘zbekiston madaniy merosi jahon to‘plamlarida” jamlanmasi taqdim etildi.
Bundan tashqari, loyiha tashkilotchilari va telekanal bosh direktori Katrin Shyofer rahbarligida Paris Premiere telekanalining top-menejerlari bilan uchrashuv o‘tkazildi va ushbu kanal orqali 2020-yil fevral—mart oylarida film namoyish etilishi borasida kelishib olindi.
Uchrashuvda bosh direktor 2020-yilning fevral—mart oylarida Jerar Depardye ishtirokida O‘zbekiston haqidagi filmni namoyish etishga tayyor ekanligini yana bir bor ma’lum qildi va shuningdek, Paris Premiere telekanali va O‘zEOAVMA o‘rtasidagi hamkorlik masalalari muhokama etildi.
Izoh (0)