Парижда таниқли француз актёри Жерар Депардье иштирокида фильм суратга олиш масалалари муҳокама қилинди. Бу ҳақда «Ўзбеккино» миллий агентлиги матбуот хизмати «Дарё»га хабар берди.
10 октябрь, пайшанба куни дунёга машҳур француз актёри Жерар Депардьенинг Париж қароргоҳида «Буюк ипак йўли» номи остидаги лойиҳа иштирокчиларининг Ўзбекистон ҳақида ҳужжатли фильм ишлаш ҳамда уни Франция ва Ўзбекистон телеканалларида намойиш этиш бўйича учрашув бўлиб ўтди.
Учрашувда Ўзбекистоннинг Франциядаги элчиси С. Рустамбоев, «Ўзбеккино» раҳбари Фирдавс Абдухолиқов ва B-Tween Production компанияси бош директори Арно Филе иштирок этди. Ўзбекистон Туризмни ривожлантириш Давлат қўмитаси ва «Ўзбекистон ҳаво йўллари» Миллий авиакомпанияси ҳам ушбу лойиҳанинг ҳаммуаллифлари ҳисобланади.
Томонлар фильм лойиҳасининг амалий жиҳатларини муҳокама қилди. Фильм муаллифларининг фикрига кўра, бош қаҳрамон Жерар Депардье бутунлай янги қиёфада томошабинларга мутлақо янги ёндашув тақдим этади. Шундай қилиб, одатий йўналиш ва машқлардан узоқлашган ҳолда фильм француз томошабинлари учун Ўзбекистоннинг янги номаълум қирраларини очиш вазифасини қўяди.
Шу мақсадда лойиҳа ташкилотчилари Ўзбекистоннинг энг ғайриоддий ва сирли жойларида суратга олиш ишларини режалаштирган. Бу Амударё бўйидаги ноёб — Окс Искандарияси, Будда ва Кушон ёдгорликлари, масалан, Фаёзтепа, Авлиё Дониёр ҳамда уч пайғамбар мақбаралари ва бошқалар. Фильмда таълимда ислом динининг роли ва моҳиятига алоҳида эътибор берилади.
«Учрашувимиз Франция ва Ўзбекистон президентлари Парижда бўлиб ўтган учрашувнинг юбилейи муносабати билан ўтаётгани рамзий маънога эга. Бугун Ўзбекистонда амалга оширилаётган ноёб ислоҳотлар ва очиқлик сиёсати барчага маълум. Президент Шавкат Мирзиёев ва унинг ислом дини эзгулик, тинчлик, бунёдкорлик ва бағрикенглик дини эканлигини дунёга етказишга қаратган саъй-ҳаракатлари мени таъсирлантирди», — деди актёр Жерар Депардье ўз уйида меҳмонларни қабул қилар чоғида.
«Биласизми, бу менинг шахсий қарашларимга мос келади, чунки мен исломни сиёсий ва худбин мақсадларда ишлатиб бўлмайди, деб ҳисоблайман. Фильмнинг катта аудиторияси бой тарихга эга, бетакрор табиат, самимий ва меҳмондўст халқ бўлган янги жўшқин Ўзбекистонни очиш учун берилган имкониятлар мени илҳомлантирди.
Ушбу мамлакатга сафаримни сабрсизлик билан кутяпман. Мамлакатингиз ўзининг бой маданий ва маънавий меросини асраб-авайлаш борасида кенг кўламли ишларни амалга оширмоқда. Бу тамаддунлар, империялар, динлар ва маданиятларнинг уйғунлашувидир. Ўзбекистоннинг ўз меросига нисбатан бундай эҳтироми таҳсинга лойиқ ва алоҳида ҳурматни талаб этади», — деди у.
Шунингдек, таниқли актёр Жерар Депардьега «Ўзбекистон маданий мероси жаҳон тўпламларида» жамланмаси тақдим этилди.
Бундан ташқари, лойиҳа ташкилотчилари ва телеканал бош директори Катрин Шёфер раҳбарлигида Paris Premiere телеканалининг топ-менежерлари билан учрашув ўтказилди ва ушбу канал орқали 2020 йил февраль—март ойларида фильм намойиш этилиши борасида келишиб олинди.
Учрашувда бош директор 2020 йилнинг февраль—март ойларида Жерар Депардье иштирокида Ўзбекистон ҳақидаги фильмни намойиш этишга тайёр эканлигини яна бир бор маълум қилди ва шунингдек, Paris Premiere телеканали ва ЎзЭОАВМА ўртасидаги ҳамкорлик масалалари муҳокама этилди.
Изоҳ (0)