Facebook ijtimoiy tarmog‘idagi Sholpan Esmuhambetova ismli foydalanuvchi O‘zbekiston milliy aviakompaniyasini “eng yomon aviakompaniya” deb atab, Samarqand va Toshkent aeroportlarida o‘zi bilan sodir bo‘lgan voqea haqida post qoldirgan.
U o‘z postida kechiktirilgan reys bo‘yicha Samarqand aeroportidan taksilar turargohiga qadar o‘z hisobidan yetib kelganini, kompensatsiya sifatida 60 ming so‘m (6 dollardan oshiqroq) to‘langani, Toshkent xalqaro aeroportida yuklarni saqlash kamerasi yo‘qligi, valyuta ayriboshlash shoxobchasining tungi vaqti ishlamayotgani haqida yozgan.
O‘zbekiston milliy aviakompaniyasi Sholpan Esmuhambetovaning e’tirozi yuzasidan xizmat tekshiruvini o‘tkazganini ma’lum qildi.
Ma’lum bo‘lishicha, 28-sentabr kuni Uzbekistan Airways’ga tegishli Airbus A320 havo kemasi “Samarqand—Istanbul” yo‘nalishi bo‘yicha HY275 reysini amalga oshirgan. Parvoz vaqtida samolyot qushlar to‘dasi bilan to‘qnashib ketgan va bu o‘ng dvigatel kuragining shikastlanishiga olib kelgan. Shu sababli “Istanbul—Samarqand” (HY276 reys) hamda “Samarqand—Toshkent” (HY044 reys) reyslarida nosozlik ro‘y bergan va xizmat ko‘rsatish zarurati jihatidan “Istanbul—Samarqand” yo‘nalishi bo‘yicha havo kemasining parvozi to‘xtatilgan. HY276 reysining yo‘lovchilari Istanbul mehmonxonasiga joylashtirilgan.
“Samarqand” aeroporti xodimlari sodir bo‘lgan hodisa haqida ogohlantirilgan bo‘lib, ularga bu kabi vaziyatlarda yo‘lovchilarga xizmat ko‘rsatish tartibiga rioya qilish buyurilgan. Mazkur qoidalarga ko‘ra, Samarqandga kelgan, undan keyingi reys bilan Toshkentga borgan yo‘lovchilarga eng yaqin reys kelguniga qadar mehmonxonada qolish imkoniyati yoki reysni bekor qilish va muqobil transport vositasida manzilga yetib olish imkoniyati taqdim etiladi. Ushbu yo‘lovchi zudlik bilan Toshkentga borishi lozimligi sabab, ikkinchi variantni tanlagan. Qoidaga ko‘ra, kompensatsiya miqdori 30 000 so‘mni tashkil etgan.
Aeroport xodimlari bilan suhbat chog‘ida aniqlanishicha, sutkaning bu vaqtida eng muqobil transport vositasi — taksi. Yo‘lovchiga to‘langan mablag‘ ruxsat etilgan tarifdan ikki barobar ko‘proqni tashkil etgan, chunki aeroport xodimlari taksi haydovchilarining tungi vaqtda qimmat narx aytishidan xavotir olgan. Kompensatsiya puli to‘langani yo‘lovchining imzosi orqali AKT bilan tasdiqlangan.
Aeroport tomonidan yo‘lovchining taksi turargohiga qadar yetib olishi uchun avtomobil taqdim etilgan. Bundan tashqari aeroport xodimi taksi turargohiga ham kelib, Toshkentga ketadigan taksi haydovchisi bilan uning suhbatini ta’minlagan.
“Hurmatli Sholpan Esmuhambetova, sodir bo‘lgan noqulaylik uchun uzr so‘raymiz. Har qanday savollar bilan Nur-Sulton (Ostona) shahridagi vakolatxonamizga murojaat qilishingiz mumkin”, — deyiladi xabarda.
Izoh (0)