Facebook ижтимоий тармоғидаги Шолпан Эсмуҳамбетова исмли фойдаланувчи Ўзбекистон миллий авиакомпаниясини «энг ёмон авиакомпания» деб атаб, Самарқанд ва Тошкент аэропортларида ўзи билан содир бўлган воқеа ҳақида пост қолдирган.
У ўз постида кечиктирилган рейс бўйича Самарқанд аэропортидан таксилар тураргоҳига қадар ўз ҳисобидан етиб келганини, компенсация сифатида 60 минг сўм (6 доллардан ошиқроқ) тўлангани, Тошкент халқаро аэропортида юкларни сақлаш камераси йўқлиги, валюта айрибошлаш шохобчасининг тунги вақти ишламаётгани ҳақида ёзган.
Ўзбекистон миллий авиакомпанияси Шолпан Эсмуҳамбетованинг эътирози юзасидан хизмат текширувини ўтказганини маълум қилди.
Маълум бўлишича, 28 сентябрь куни Uzbekistan Airways’га тегишли Airbus А320 ҳаво кемаси «Самарқанд—Истанбул» йўналиши бўйича HY275 рейсини амалга оширган. Парвоз вақтида самолёт қушлар тўдаси билан тўқнашиб кетган ва бу ўнг двигатель курагининг шикастланишига олиб келган. Шу сабабли «Истанбул—Самарқанд» (HY276 рейс) ҳамда «Самарқанд—Тошкент» (HY044 рейс) рейсларида носозлик рўй берган ва хизмат кўрсатиш зарурати жиҳатидан «Истанбул—Самарқанд» йўналиши бўйича ҳаво кемасининг парвози тўхтатилган. HY276 рейсининг йўловчилари Истанбул меҳмонхонасига жойлаштирилган.
«Самарқанд» аэропорти ходимлари содир бўлган ҳодиса ҳақида огоҳлантирилган бўлиб, уларга бу каби вазиятларда йўловчиларга хизмат кўрсатиш тартибига риоя қилиш буюрилган. Мазкур қоидаларга кўра, Самарқандга келган, ундан кейинги рейс билан Тошкентга борган йўловчиларга энг яқин рейс келгунига қадар меҳмонхонада қолиш имконияти ёки рейсни бекор қилиш ва муқобил транспорт воситасида манзилга етиб олиш имконияти тақдим этилади. Ушбу йўловчи зудлик билан Тошкентга бориши лозимлиги сабаб, иккинчи вариантни танлаган. Қоидага кўра, компенсация миқдори 30 000 сўмни ташкил этган.
Аэропорт ходимлари билан суҳбат чоғида аниқланишича, сутканинг бу вақтида энг муқобил транспорт воситаси — такси. Йўловчига тўланган маблағ рухсат этилган тарифдан икки баробар кўпроқни ташкил этган, чунки аэропорт ходимлари такси ҳайдовчиларининг тунги вақтда қиммат нарх айтишидан хавотир олган. Компенсация пули тўлангани йўловчининг имзоси орқали АКТ билан тасдиқланган.
Аэропорт томонидан йўловчининг такси тураргоҳига қадар етиб олиши учун автомобиль тақдим этилган. Бундан ташқари аэропорт ходими такси тураргоҳига ҳам келиб, Тошкентга кетадиган такси ҳайдовчиси билан унинг суҳбатини таъминлаган.
«Ҳурматли Шолпан Эсмуҳамбетова, содир бўлган ноқулайлик учун узр сўраймиз. Ҳар қандай саволлар билан Нур-Султон (Остона) шаҳридаги ваколатхонамизга мурожаат қилишингиз мумкин», — дейилади хабарда.
Изоҳ (0)