Tojikistonda sim-kartalarni noqonuniy sotish va boshqalarga berib yuborganlik uchun jazo choralari kuchaytirildi. Bu haqda Asia-Plus xabar bermoqda.
Mamlakat prezidenti Emomali Rahmon tomonidan imzolangan Tojikiston Jinoiy kodeksiga qo‘shimchalarga muvofiq, ushbu hujjatga 341-modda, 1-eslatma kiritilmoqda. Unda sim-kartalarning uchinchi shaxsga berilishi uch yilgacha ozodlikdan mahrum etish bilan jazolanishi mumkinligi belgilangan.
Elektr aloqa tarmoqlariga noqonuniy ulanish yoki sim-kartani uchinchi shaxsga berish, agarda sim-karta terroristik yoki ekstremistik ko‘rinishdagi jinoyatni sodir etishda foydalanilgudek bo‘lsa, 800 dan 1,5 minggacha hisob-kitob ko‘rsatkichi (44 mingdan 82,5 ming somoniygacha yoki 4,5 ming —8,5 ming dollar atrofida) miqdoridagi jarima yoki ikki yildan uch yilgacha ozodlikdan mahrum etish bilan jazolanadi, — deyiladi ushbu moddaning ikkinchi punktida.Ma’lumot uchun, Tojikiston hukumati tomonidan joriy yil boshida qabul qilingan “Elektr aloqa tarmoqlariga ulanish tartibi va talablari to‘g‘risida”gi qarorga qo‘shimchaga ko‘ra, barcha mobil kompaniyalari abonentlari 2020-yil 15-fevralgacha sim-kartalarini ID pasportlariga qaytadan ro‘yxatdan o‘tkazishi kerak.
Shuningdek, bir fuqaro faqat ikkita sim-kartadan foydalanishi mumkin. Voyaga yetmaganlar 16 yoshga to‘lganda va ota-onasining yozma ruxsati bilangina sim-karta xarid qiladi.
Mas’ul shaxslarga har bir sim-karta sotish punktida kuzatuv kameralari o‘rnatish vazifasi yuklatilgan.
Izoh (0)