Тожикистонда сим-карталарни ноқонуний сотиш ва бошқаларга бериб юборганлик учун жазо чоралари кучайтирилди. Бу ҳақда Asia-Plus хабар бермоқда.
Мамлакат президенти Эмомали Раҳмон томонидан имзоланган Тожикистон Жиноий кодексига қўшимчаларга мувофиқ, ушбу ҳужжатга 341-модда, 1-эслатма киритилмоқда. Унда сим-карталарнинг учинчи шахсга берилиши уч йилгача озодликдан маҳрум этиш билан жазоланиши мумкинлиги белгиланган.
Электр алоқа тармоқларига ноқонуний уланиш ёки сим-картани учинчи шахсга бериш, агарда сим-карта террористик ёки экстремистик кўринишдаги жиноятни содир этишда фойдаланилгудек бўлса, 800 дан 1,5 минггача ҳисоб-китоб кўрсаткичи (44 мингдан 82,5 минг сомонийгача ёки 4,5 минг —8,5 минг доллар атрофида) миқдоридаги жарима ёки икки йилдан уч йилгача озодликдан маҳрум этиш билан жазоланади, — дейилади ушбу модданинг иккинчи пунктида.Маълумот учун, Тожикистон ҳукумати томонидан жорий йил бошида қабул қилинган «Электр алоқа тармоқларига уланиш тартиби ва талаблари тўғрисида»ги қарорга қўшимчага кўра, барча мобил компаниялари абонентлари 2020 йил 15 февралгача сим-карталарини ID паспортларига қайтадан рўйхатдан ўтказиши керак.
Шунингдек, бир фуқаро фақат иккита сим-картадан фойдаланиши мумкин. Вояга етмаганлар 16 ёшга тўлганда ва ота-онасининг ёзма рухсати билангина сим-карта харид қилади.
Масъул шахсларга ҳар бир сим-карта сотиш пунктида кузатув камералари ўрнатиш вазифаси юклатилган.
Изоҳ (0)